లలితకుమారి నామపత్రం దాఖలు

ఎస్‌.కోటలో రిటర్నింగ్‌ అధికారికి నామినేషన్‌ అందజేస్తున్న లలితకుమారి

శృంగవరపుకోట, న్యూస్‌టుడే: శృంగవరపుకోట అసెంబ్లీ నియోజకవర్గ తెదేపా అభ్యర్థిగా కోళ్ల లలితకుమారి బుధవారం నామినేషన్‌ దాఖలు చేశారు. ఉదయం ఎల్‌.కోటకు నాయకులు, కార్యకర్తలు తరలిరాగా ర్యాలీగా ఎస్‌.కోటకు చేరుకున్నారు. ఆకులడిపో నుంచి పార్టీ శ్రేణులతో కలసి దుర్గాదేవి ఆలయానికి చేరుకుని ప్రత్యేక పూజలు చేశారు. తహసీల్దార్‌ కార్యాలయానికి వెళ్లి రిటర్నింగ్‌ అధికారి పి.మురళీకృష్ణకు మూడు సెట్ల నామపత్రాలు అందజేశారు. కొట్యాడ రమణమూర్తి, బొబ్బిలి అప్పారావు, కర్రెడ్లు ఈశ్వరరావు ప్రతిపాదించారు. డమ్మీగా తల్లి గొంప సత్యవతి నామినేషన్‌ వేశారు. పార్టీ రాష్ట్ర అధికార ప్రతినిధి గొంప కృష్ణ, రాష్ట్ర కార్యదర్శి ఐ.సుధారాజు, జనసేన నాయకుడు సత్యనారాయణ, భాజపా నాయకురాలు జగదీశ్వరి, కోళ్ల రాంప్రసాద్‌, గొంప దుర్గాఉమేష్‌ పాల్గొన్నారు.