ప్రయోగ పరీక్షలకు డిగ్రీ అధ్యాపకులు

చీపురుపల్లి గ్రామీణం, న్యూస్‌టుడే: ఇంటర్మీడియట్‌ ప్రయోగ పరీక్షల్లో తొలిసారిగా డిగ్రీ అధ్యాపకుల సేవలను వినియోగించుకునేలా ఉన్నత విద్యాశాఖ మండలి అనుమతి  ఇచ్చింది. ఇంటర్‌ బోర్డు విజ్ఞప్తి మేరకు ఆదేశాలు జారీ చేసింది. ఈ ఏడాది ఇంటర్‌ ప్రయోగ పరీక్షల్లో మార్పులు చేసిన సంగతి విదితమే. ఈ ఏడాది పది రోజుల్లోనే ప్రయోగ పరీక్షలు పూర్తి చేయాలన్నది లక్ష్యంగా పెట్టుకున్నారు. ఈ నేపథ్యంలో సరిపడా సిబ్బంది లేని కారణంగా డిగ్రీ తరగతులు బోధిస్తున్న భౌతిక, రసాయన శాస్త్రాల అధ్యాపకుల సేవలను వినియోగించుకోవడానికి బోర్డు విజ్ఞప్తిపై ఉన్నత విద్యామండలి సానుకూలంగా స్పందించింది. ఆ మేరకు ప్రభుత్వ డిగ్రీ కళాశాలల్లో పనిచేస్తున్న అధ్యాపకుల వివరాలను పంపారు. ఈ విషయంపై ఆర్జేడీ సత్యనారాయణ మాట్లాడుతూ ఉన్నత విద్యామండలి అనుమతించిన మేరకు ఎక్కడ అవసరమైతే అక్కడ డిగ్రీ అధ్యాపకుల సేవలను వినియోగించుకుంటామని ‘న్యూస్‌టుడే’కు తెలిపారు.

ఉమ్మడి జిల్లాల్లో ఇదీ పరిస్థితి... 
విద్యార్థులు: 29,444
పరీక్షా కేంద్రాలు: 155  
పార్వతీపురం మన్యంలో : 44
విజయనగరంలో: 111