వృద్ధురాలి హత్యకేసులో ఇద్దరి అరెస్ట్‌

కొత్తపట్నం, న్యూస్‌టుడే: ఇటీవల జరిగిన వృద్ధురాలి హత్య కేసుకు సంబంధించి ఇద్దరు నిందితులను మంగళవారం పోలీసులు అరెస్ట్‌ చేశారు. వారి కథనం ప్రకారం.. కొత్తపట్నంలోని రెడ్డిపాలెం గ్రామానికి చెందిన గుడిపల్లి నాగేశ్వరమ్మ(75) కల్లు విక్రయిస్తూ జీవనం సాగిస్తున్నారు. ఈ నెల 18న అర్ధరాత్రి ఇంట్లో ఒంటరిగా ఉన్న సమయంలో రెడ్డిపాలేనికి చెందిన నాగరాజు, నాంచార్లు కల్లు దొంగతనంగా తాగడానికి ఆమె ఇంటికి వెళ్లారు. ఆ తర్వాత కల్లు తాగి మత్తులో చోరీకి యత్నించారు. నిద్రిస్తున్న ఆమెను గొంతు నులిమి, ముక్కు మూసి ఊపిరాడకుండా చేసి హత్యకు పాల్పడ్డారు. అనంతరం ఆమె చెవికి ఉన్న రెండు గ్రాముల బంగారు ఆభరణాలు దొంగిలించారు. ఆ రోజునే ఏఎస్పీ శ్రీధర్‌రావు, డీఎస్పీ కిషోర్, సీఐ జగదీష్‌ సంఘటనా స్థలాన్ని పరిశీలించారు. ఈ మేరకు విచారణ చేపట్టిన పోలీసులు అనుమానాస్పదంగా ఉన్న వ్యక్తులను అదుపులోకి తీసుకుని విచారించారు. నాగరాజు, నాంచార్లు వృద్ధురాలిని హత్య చేసినట్లు అంగీకరించడంతో వారిద్దరిని మంగళవారం పోలీసులు అరెస్ట్‌ చేశారు. అనంతరం రిమాండ్‌ నిమిత్తం ఒంగోలులోని కోర్టులో హాజరుపరిచారు.