మోగని చప్పట్లు.. తప్పని అగచాట్లు

సభా ప్రాంగణంలో నిలిపి ఉంచిన మంచినీళ్ల ట్యాంకర్‌, ఓ ప్రైవేట్‌ బస్సు నీడన కూర్చుని భోజనాలు

• ముఖ్యమంత్రి జగన్‌ మోహన్‌ రెడ్డి తన ప్రసంగంలో తెదేపా అధినేత చంద్రబాబునుద్దేశించి వ్యంగ్యంగా మాట్లాడుతున్న సమయంలో పురపాలక శాఖ ప్రధాన కార్యదర్శి వై.శ్రీలక్ష్మి ఆద్యంతం నవ్వుతూ కనిపించారు. అదే సమయంలో జనం నుంచి మాత్రం పెద్దగా స్పందన లేదు.
• సభలో కలెక్టర్‌ దినేష్‌ కుమార్‌, ఎమ్మెల్యే బాలినేని శ్రీనివాసరెడ్డి, ముఖ్యమంత్రి జగన్‌ మోహన్‌ రెడ్డి మాత్రమే ప్రసంగించారు. జగన్‌ మాట్లాడినంతసేపు బాలినేని, చెవిరెడ్డి భాస్కర్‌రెడ్డి ఆయన వెనుక నిల్చుని ఉన్నారు.
• ఒంగోలు నగరానికి చెందిన ఇంటి పట్టాల లబ్ధిదారులు లలిత మౌనిక, శివపార్వతిలతో ముఖాముఖి మాట్లాడించారు. ప్రతి మాటకు జగనన్న అంటూ పొగడ్తలు కురిపించారు.
• ఎండ తీవ్రత ఎక్కువగా ఉండటంతో ఎక్కువ మంది మహిళలు బస్సుల్లోనే ఉండిపోయారు. ముఖ్యమంత్రి వచ్చిన తర్వాత కూడా సభా ప్రాంగణం దగ్గరకు బస్సులు రావడంతో వాటిలోనే కూర్చున్నారు.

ముఖ్యమంత్రి ప్రసంగిస్తుండగానే సభ నుంచి గుంపుగా బయటకి వెళ్లిపోతున్న మహిళలు

• సభకు వచ్చిన స్వయం సహాయక సంఘాల మహిళలకు బస్సుల్లోనే భోజనం పార్శిళ్లు అందించారు. పులిహోర, పెరుగన్నం వాసన వస్తుండటంతో పలువురు తినకుండా వదిలేశారు.
• ఇంటి పట్టాల లబ్ధిదారులతో పాటు, ఒంగోలు, సంతనూతలపాడు, కొండపి నియోజకవర్గాల నుంచి ఎక్కువ మంది మహిళలను బస్సుల్లో తరలించుకు వచ్చారు. తాత్కాలిక మరుగుదొడ్లు ఎక్కడ ఏర్పాటు చేసిందీ తెలియక చాలామంది మూత్ర విసర్జనకు వెళ్లేందుకు ఇబ్బంది పడ్డారు.
• ఎండ తీవ్రత ఎక్కువగా ఉండటం.. నీడ సౌకర్యం లేకపోవడంతో మహిళా పోలీసు సిబ్బంది టెంట్‌ కింద పరిమితమయ్యారు. సభకు వచ్చిన మహిళలు నీళ్ల ట్యాంకర్ల కింద, ఐస్‌క్రీం బండ్ల వద్ద, స్వాగత ద్వారాలకు ఏర్పాటు చేసిన కర్రల నీడన సేదతీరుతూ కనిపించారు.‌
• ఎండకు తాళలేక పలువురు సీఎం ప్రసంగిస్తుండగానే తిరుగుముఖం పట్టారు. బస్సుల్లో కూర్చుని సభ ఎప్పుడు ముగుస్తుందా అంటూ పడిగాపులు పడ్డారు.

న్యూస్‌టుడే, ఒంగోలు గ్రామీణం