వాలంటీర్లకు తాయిలాల ఎర.. రూ.30 లక్షలు పంపిణీ చేసినట్లు ప్రచారం

పెద్దారవీడు, న్యూస్‌టుడే: వచ్చే ఎన్నికల్లో ఎలాగైనా గెలిచేందుకు వైకాపా నేతలు అడ్డదారులు తొక్కుతున్నారు. ఆ క్రమంలో వాలంటీర్లకు తాయిలాలు పంపిణీ చేస్తున్నారు. తాజాగా, వైకాపా మార్కాపురం నియోజకవర్గ కన్వీనర్‌గా నియమితులైన గిద్దలూరు ఎమ్మెల్యే అన్నా రాంబాబుకు చెందిన ఓ ఇంజినీరింగ్‌ కళాశాలలో... తర్లుపాడు, మార్కాపురం మండలాలకు చెందిన 450 మంది వాలంటీర్లతో శనివారం సమావేశం నిర్వహించారు. ఒక్కొక్కరికీ రూ.5 వేలు చొప్పున నగదు, స్వీట్‌ బాక్సులు అందజేసి... ఎన్నికల్లో తనకు సహకరించాలని కోరినట్లు తెలిసింది. మొత్తంగా రూ.30 లక్షలు పంపిణీ చేసినట్లు సమాచారం. తాయిలాలు అందుకునేందుకు దేవరాజుగట్టు సమీపంలోని కళాశాలకు సోమవారం రావాలని... నియోజకవర్గంలోని మిగిలిన మండలాల వాలంటీర్లకూ సమాచారం ఇచ్చినట్లు ప్రచారం జరుగుతోంది.