మట్టినీ వదలం

యథేచ్ఛగా తవ్వకాలు

స్పందించని యంత్రాంగం

నెలవంక చెరువులో పొక్లెయిన్‌తో మట్టిని తవ్వి ట్రాక్టర్‌లో వేస్తున్న దృశ్యం

కవిటి గ్రామీణం, న్యూస్‌టుడే: కవిటి మండలంలో యథేచ్ఛగా మట్టి తవ్వకాలు సాగుతున్నాయి. ఎలాంటి అనుమతులు లేకుండా సాగిస్తున్న తవ్వకాలపై అధికారులు చర్యలకు ఉపక్రమించకపోవడంతో అక్రమార్కులు చెలరేగిపోతున్నారు. దీంతో చెరువులు, మెట్ట ప్రాంతాల రూపురేఖలు మారిపోతున్నాయి. గ్రామస్థాయి నాయకుల అండతో ఇది జరుగుతున్నట్లు తెలియడంతో అధికారులు అటువైపు చూడడం లేదు.

నిబంధనలకు పాతర..

ఒకచోట నుంచి మరోచోటుకు మట్టి తరలింపు, మెట్టప్రాంతాల్లో తవ్వకాలకు రెవెన్యూ, జల వనరుల శాఖ అధికారుల అనుమతులు తీసుకోవాలి. అలా తరలించే మట్టి వ్యవసాయ అవసరాలకు మాత్రమే వినియోగించాల్సి ఉంటుంది. ఇచ్ఛాపురం, కవిటి, కంచిలి, సోంపేట మండలాల్లో నిబంధనలకు విరుద్ధంగా తవ్వకాలు జరుపుతున్నారు. వాణిజ్య అవసరాలు, అక్రమ లేఅవుట్ల అభివృద్ధికి తరలిస్తున్నారు.

అనుమతులు ఇవ్వలేదు

ట్రాక్టర్‌ మట్టిని రూ.3 వందల నుంచి రూ.4 వందల వరకు విక్రయిస్తున్నారు. మట్టి ట్రాక్టర్లు నిరంతరం రాకపోకలు సాగిస్తుండడంతో సీసీ రహదారులతో పాటు పొలాలకు సంబంధించిన రోడ్లు ధ్వంసమవుతున్నాయి. ఈ విషయం జలవనరుల ఏఈఈ మధుసూధన పాణిగ్రహి దృష్టికి తీసుకెళ్లగా మట్టి తవ్వకాలకు ఎలాంటి అనుమతులివ్వలేదని తెలిపారు. విధిగా రెవెన్యూ, జలవనరుల శాఖ అనుమతులు తీసుకోవాలన్నారు. నిబంధనలకు విరుద్ధంగా తవ్వకాలు జరిపినా, తరలించినా చర్యలు తీసుకుంటామన్నారు.