నేడు 13 మండలాల్లో తీవ్ర వడగాలులు

కలెక్టరేట్‌ (శ్రీకాకుళం), న్యూస్‌టుడే: జిల్లాలోని 13 మండలాల్లో తీవ్ర వడగాలులు వీచే అవకాశం ఉందని రాష్ట్ర విపత్తుల నిర్వహణ సంస్థ హెచ్చరికలు జారీ చేసినట్లు కలెక్టర్‌ మనజీర్‌ జిలానీ సామూన్‌ మంగళవారం ఒక ప్రకటనలో తెలిపారు. ఆమదాలవలస, బూర్జ, జి.సిగడాం, పొందూరు, సరుబుజ్జిలి, నరసన్నపేట, జలుమూరు, టెక్కలి, కోటబొమ్మాళి, సారవకోట, పాతపట్నం, హిరమండలం, ఎల్‌.ఎన్‌.పేట మండలాల్లో తీవ్ర వడగాలులు, శ్రీకాకుళం, సోంపేట, రణస్థలం, సంతబొమ్మాళి, పోలాకి, పలాస, లావేరు, గార, ఎచ్చెర్ల, ఇచ్ఛాపురం, కంచిలి, కవిటి, కొత్తూరు, మందస, నందిగాం, మెళియాపుట్టి మండలాల్లో వడగాలులు వీచే అవకాశం ఉందని చెప్పారు. మంగళవారం జిల్లాలో సారవకోట మండలంలో 43.7 డిగ్రీల అధిక ఉష్ణోగ్రత నమోదైనట్లు పేర్కొన్నారు. 20 మండలాల్లో తీవ్ర వడగాలులు, 7 మండలాల్లో వడగాలులు వీచాయని వివరించారు. ప్రజలు వీలైనంత వరకు ఉదయం 11 నుంచి సాయంత్రం 4 గంటల వరకు ఇంట్లోనే ఉండాలన్నారు. వృద్ధులు, గర్భిణులు, బాలింతలు అప్రమత్తంగా ఉండాలని కలెక్టర్‌ సూచించారు.