29 కేంద్రాల్లో 50 శాతం లోపే..!

పోలింగ్‌కు దూరంగా నగర వాసులు
న్యూస్‌టుడే, కలెక్టరేట్‌(శ్రీకాకుళం)

శ్రీకాకుళం నియోజకవర్గంలో కీలకమైన నగరంలో పోలింగ్‌ శాతం ఆశించిన స్థాయిలో లేదు. మొత్తం 279 పోలింగ్‌ కేంద్రాలు ఉండగా కొన్ని చోట్ల 50 శాతం కంటే తక్కువ నమోదైంది. అధికారులు అవగాహన కార్యక్రమాలు నిర్వహించినా ఆశించిన స్థాయిలో ఓటర్లు ముందుకు రాకపోవడం గమనార్హం. 

• శ్రీకాకుళం నియోజకవర్గంలో నగరం, గ్రామీణ మండలం, గార మండలాలకు సంబంధించి 139 ప్రాంతాల్లో 279 పోలింగ్‌ కేంద్రాలు ఏర్పాటు చేశారు. గార మండలంలో 75, శ్రీకాకుళం నగరంలో 115, గ్రామీణ మండలంలో 89 పోలింగ్‌ కేంద్రాలు ఉన్నాయి. శ్రీకాకుళం నగరంలోని 29 కేంద్రాల్లో 50 శాతం కంటే తక్కువగా.. 53 చోట్ల 50 నుంచి 60 శాతం మధ్య పోలింగ్‌ నమోదైంది.
• శ్రీకాకుళం నియోజకవర్గంలో 68.31 శాతం పోలింగ్‌ నమోదైంది. ఓటింగ్‌ శాతం తక్కువగా నమోదైన కేంద్రాలన్నీ నగర పరిధిలోవే. గార మండలం, శ్రీకాకుళం గ్రామీణ మండలంలో ఓటర్లు పెద్దఎత్తున ఓటు హక్కు వినియోగించుకోవడం విశేషం.