పాలకులు నింపిన చీకట్లు..!

హిరమండలంలోని గొట్టాబ్యారేజీ నిర్వహణను ప్రభుత్వం గాలికొదిలేసింది. 450 మీటర్ల పొడవున్న బ్యారేజీ వద్ద 22 స్పిల్‌వే, 2 అత్యవసర గేట్లు ఉన్నాయి. గతంలో ప్రతి రెండు గేట్ల మధ్య సోడియం విద్యుద్దీపాలు అమర్చారు. వీటి నిర్వహణకు ఏటా నిధులొచ్చేవి. వైకాపా అధికారంలోకి వచ్చాక నిధుల్లేక పాడైన దీపాలను పట్టించుకోవడం మానేశారు. ఫలితంగా రాత్రి వేళ బ్యారేజీ వద్ద అంధకారం అలముకుంటోంది.  ఆంధ్రా నుంచి ఒడిశాకు ఇదే ప్రధాన మార్గం. నిత్యం వందలాది వాహనాలు దీనిపై నుంచి రాకపోకలు సాగిస్తాయి. రాత్రివేళ కారుచీకట్ల కారణంగా తరచూ ప్రమాదాలు జరుగుతున్నాయి. ‘నిర్వహణ నిధులకు ప్రతిపాదించాం. మంజూరైన వెంటనే దీపాలు వేసేందుకు చర్యలు తీసుకుంటాం’ అని వంశధార ఎస్‌ఈ డోల తిరుమలరావు పేర్కొన్నారు.

న్యూస్‌టుడే, హిరమండలం