ప్రభుత్వంపై అసంతృప్తికి నిదర్శనం

మాట్లాడుతున్న కూన రవికుమార్‌

గుజరాతీపేట(శ్రీకాకుళం), న్యూస్‌టుడే: జిల్లా కేంద్రంలో సోమవారం జరిగిన రా కదలిరా సభకు తరలివచ్చిన అశేష జనవాహిని వైకాపా ప్రభుత్వంపై ప్రజల్లో ఉన్న అసంతృప్తికి నిదర్శనమని తెదేపా శ్రీకాకుళం పార్లమెంట్‌ నియోజకవర్గ అధ్యక్షుడు కూన రవికుమార్‌ అన్నారు. ఆ పార్టీ జిల్లా కార్యాలయంలో మంగళవారం నిర్వహించిన విలేకర్ల సమావేశంలో ఆయన మాట్లాడారు. సీఎం జగన్‌రెడ్డి సభలకు బస్సుల్లో జనాలను తరలిస్తున్నారని, అందుకు భిన్నంగా తెదేపా సభకు వేలాదిమంది స్వచ్ఛందంగా వచ్చారని చెప్పారు. వైకాపా అధికారంలోకి వచ్చినప్పటి నుంచి తెదేపా నాయకులు, కార్యకర్తలపై దాడులకు పాల్పడటంతో అంతా విసిగిపోయారని, ప్రజల్లో ఇదే భావన ఉందన్నారు. చంద్రబాబు పర్యటనను విజయవంతం చేసేందుకు సహకరించిన ప్రతి ఒక్కరికీ కృతజ్ఞతలు తెలిపారు. సమావేశంలో తెదేపా సీనియర్‌ నాయకుడు పీఎంజే బాబు, బొనిగి భాస్కరరావు, సింతు సుధాకర్‌, ఎస్‌.వి.రమణమాదిగ, మాదారపు వెంకటేష్‌, రామరాజు పాల్గొన్నారు.