నిరం మారుం ఉలగిల్‌ ఫస్ట్‌లుక్‌ విడుదల

సైదాపేట, న్యూస్‌టుడే: ప్రముఖ దర్శకుడు భారతిరాజా ముఖ్య పాత్రలో నటిస్తున్న చిత్రం ‘నిరం మారుం ఉలగిల్‌’. ఈ సినిమా ఫస్ట్‌లుక్‌ ఆదివారం విడుదలైంది. ఈ సినిమాలో భారతిరాజాతో పాటు నట్టి, రియోరాజ్‌, శాండి, సురేష్‌ మేనన్‌, ఆడుగళమ్‌ నరేన్‌, మైమ్‌ గోపి, వడివుక్కరసి, విగ్నేష్‌కాంత్‌, కనికా, ఆదరా తదితరులు ఇతర తారాగణం. మల్లికా అర్జున్‌, మణికంఠ రాజా సినిమాటోగ్రఫి అందించిన ఈ సినిమాకి దేవ ప్రకాష్‌ సంగీతం అందించారు. సిగ్నేచర్‌ ప్రొడక్షన్‌, జీఎస్‌ సినిమా ఇంటర్నేషనల్‌ సంస్థలు సినిమాను నిర్మిస్తున్నాయి. నలుగురు వ్యక్తుల జీవితం ఒక చోట కలిసే కథగా ఈ సినిమా రూపొందింది. జీవితంలో సంబంధబాంధవ్యాల గురించి తెలియజేసే సినిమాగా ఉంటుందని చిత్ర బృందం తెలిపింది. ప్రస్తుతం పోస్ట్‌ప్రొడక్షన్‌ పనులు జరుపుకుంటున్న ఈ సినిమా విడుదల తేదీ త్వరలో ప్రకటించనున్నారు.

తలైవర్‌ 171 కొత్త పోస్టర్‌...

సైదాపేట: సూపర్‌స్టార్‌ రజనీకాంత్‌ ప్రస్తుతం జ్ఞానవేల్‌ రాజా దర్శకత్వం వహిస్తున్న ‘వేట్టయ్యన్‌’ సినిమాలో నటిస్తున్నారు. ఈ ఏడాది చివరిన సినిమా విడుదల కానుంది. ఆ తర్వాత రజనీకాంత్‌ లోకేష్‌ కనకరాజ్‌ దర్శకత్వంలో నటించనున్నారు. ఈ సినిమాకు తాత్కాలికంగా ‘తలైవర్‌ 171’ అని వర్కింట్‌ టైటిల్‌ పెట్టారు. సన్‌ పిక్చర్స్‌ సంస్థ నిర్మిస్తుంది. అనిరుధ్‌ సంగీతం సమకూర్చుతున్నారు. ఈ సినిమాలో రజనీ ఫస్ట్‌లుక్‌ ఇటీవల విడుదలై మంచి స్పందన వచ్చింది. ఈ సినిమాలో రజనీ దాదాగా నటిస్తున్నట్లు సమాచారం. రన్‌వీర్‌ సింగ్‌ ముఖ్య పాత్రలో నటిస్తున్నారు. 22న ఫస్ట్‌లుక్‌ ప్రివ్యూ విడుదల కానుంది. ఈ నేపథ్యంలో సినిమాకు సంబంధించి కొత్త పోస్ట్‌ర్‌ ఆదివారం విడుదలైంది. అందులో రజనీకాంత్‌ చేయి, గడియారాలతో చేసిన గొలుసును పట్టుకుని ఉన్నారు. ఈ పోస్టర్‌ను లోకేష్‌ కనకరాజ్‌ తన ఎక్స్‌ పేజీలో విడుదల చేశారు.

కార్తిక్‌ సుబ్బురాజ్‌ దర్శకత్వంలో సూర్య 44వ సినిమా

సైదాపేట, న్యూస్‌టుడే: సూర్య నటించనున్న 44వ సినిమాకు ప్రముఖ దర్శకుడు కార్తిక్‌ సుబ్బురాజ్‌ దర్శకత్వం వహించనున్నారు. ఈ సినిమా షూటింగ్‌ జూన్‌ 17న ప్రారంభం కానుంది. పిజ్జా సినిమాతో తమిళ సినిమాకు పరిచయం అయిన దర్శకుడు కార్తిక్‌ సుబ్బరాజ్‌ వైవిధ్యమైన సినిమాలు తీయడంలో దిట్ట. ఈయన దర్శకత్వంలో ఇటీవల వచ్చిన రాఘవ లారెన్స్‌, ఎస్‌జే సూర్య నటించిన ‘జిగర్తాండా-2’ భారీ విజయం సొంతం చేసుకుంది. ఈ నేపథ్యంలో కార్తిక్‌ సబ్బురాజ్‌ తదుపరిగా సూర్య నటించే 44వ సినిమాకు దర్శకత్వం వహించనున్నారు. పీరియాడిక్‌ గ్యాంగ్‌స్టర్‌, ప్రేమ నేపథ్యంలో ఈ సినిమా రూపొందనుంది. సూర్య ద్విపాత్రాభినయం చేయనున్నారు. సంతోష్‌ నారాయణన్‌ సంగీతం సమకూర్చనున్నారు.