కవిన్‌కు జోడీగా నయనతార?

చెన్నై, న్యూస్‌టుడే: దర్శకుడు నెల్సన్‌ నిర్మిస్తున్న ‘బ్లడి బగర్‌’, అరుణ్‌ దర్శకత్వం వహిస్తున్న ‘ఊర్‌ కురివి’ చిత్రాల్లో కవిన్‌ నటిస్తున్నారు. ఈ నేపథ్యంలో ‘7 స్క్రీన్‌ స్టూడియో’ నిర్మిస్తున్న ఓ చిత్రంలోనూ కవిన్‌ హీరోగా నటించనున్నట్టు వార్తలు వినిపిస్తున్నాయి. చిత్రంలో ఆయనకు జోడీగా నయనతార నటించనున్నట్టు కోలీవుడ్‌ సమాచారం. ఈ చిత్రానికి మాటలు రచయిత, గేయ రచయిత విష్ణు ఏదావన్‌ దర్శకత్వం వహించనున్నారనీ తెలిసింది.

రాయన్‌ రెండో సింగిల్‌ విడుదల నేడు

చెన్నై: ధనుష్‌ 50వ చిత్రంగా ‘రాయన్‌’ రూపొందుతున్న విషయం తెలిసిందే. సన్‌ పిక్చర్స్‌ నిర్మిస్తున్న ఈ చిత్రానికి ధనుష్‌ దర్శకత్వం కూడా వహిస్తున్నారు. ఏ.ఆర్‌.రహమాన్‌ సంగీతం సమకూర్చుతున్న ఈ చిత్రం తొలి సింగిల్‌ ఇటీవల విడుదలై శ్రోతల ఆదరణాభిమానాలు పొందింది. ఈ నేపథ్యంలో రెండో సింగిల్‌ శుక్రవారం విడుదల కానున్నట్టు చిత్రబృందం ప్రకటించింది. దీనికి సంబంధించిన పోస్టరులో సందీప్‌ కిషన్, అపర్ణ బాలమురళీ సైకిల్‌పై వెళ్లే దృశ్యం ఆకట్టుకుంటోంది.

పిళ్లైయార్‌ సుళి చిత్రీకరణ పూర్తి

చెన్నై: మనోగరన్‌ పెరియతంబి దర్శకత్వం వహించిన ‘పిళ్లైయార్‌ సుళి’ చిత్రంలో ధీరజ్, అభినయ హీరోహీరోయిన్లుగా నటించారు. రేవతి, మైమ్‌ గోపి, మాథ్యూ వర్గీస్, పవర్‌ స్టార్‌ శ్రీనివాసన్, దర్శన్, జీవా రవి, పళని దేవి, ఆర్జే మహాలక్ష్మి తదితరులు ఇతర తారాగణం. ఓ దివ్యాంగ చిన్నారి జీవితాన్ని కేంద్రంగా చేసుకుని ఈ చిత్రాన్ని రూపొందించినట్టు దర్శకుడు వెల్లడించారు. చిత్రీకరణ పనులు ముగిసి తుదిదశ పనులు జరుగుతున్నాయని తెలిపారు. ఈ చిత్రం న్యూయార్క్‌ చిత్రోత్సవాల్లో ఇటీవల ఆఖరి రౌండ్‌కు ఎంపికకావడం గమనార్హం.

అరణ్మనై-4 వసూళ్ల రికార్డు

చెన్నై: సుందర్‌.సి దర్శకత్వంలో ‘అరణ్మనై-4’ మే 3న విడుదలైన విషయం తెలిసిందే. తొలి మూడు భాగాలు తరహాలోనే ఈ చిత్రంలోనూ సుందర్‌.సి నటించారు. తమన్నా, రాశి కన్నా, యోగిబాబు, కోవై సరళ, వీటీవీ గణేశ్‌ తదితరులు ఇతర నటీనటులు. మిగతా మూడు చిత్రాల కన్నా ఈ సినిమాలో గ్రాఫిక్స్, విఎఫెక్స్‌ దృశ్యాలు ఆకట్టుకునేలా ఉన్నాయి. ఈ చిత్రం తమిళంతో పాటు తెలుగు భాషల్లో, ప్రపంచ స్థాయిలో విడుదలైంది. చిత్రం విడుదలై 19 రోజులు పూర్తయిన నేపథ్యంలో ఇప్పటివరకు ప్రపంచవ్యాప్తంగా రూ.100 కోట్ల వసూళ్లు రాబట్టింది. ఈ ఏడాది విడుదలైన చిత్రాల్లో వసూళ్ల పరంగా ‘అరణ్మనై-4’ తొలిస్థానంలో ఉంది. రాష్ట్రంలో విడుదలైన ‘మంజుమ్మల్‌ బాయ్స్‌’ వసూళ్ల రికార్డునూ అధిగమించింది.