జయలలితకు మత విశ్వాసాల్లేవు: శశికళ

సైదాపేట, న్యూస్‌టుడే: జయలలితకు దైవ నమ్మకం ఉండేదని, మత విశ్వాసాల్లేవని ఆమె నెచ్చెలి శశికళ తెలిపారు. దివంగత ముఖ్యమంత్రి జయలలిత హిందుత్వ సిద్ధాంతాలు పాటించేవారని దిల్లీలో నిర్వహించిన ఎన్నికల ప్రచారంలో తమిళనాడు భాజపా అధ్యక్షుడు అన్నామలై పేర్కొన్నారు. ఈ వ్యాఖ్యలను అన్నాడీఎంకే నేతలు ఖండిస్తున్నారు. ఇందుకు సంబంధించి శశికళ విడుదల చేసిన ప్రకటనలో... జయలలిత గురించి అన్నామలై చేసిన వ్యాఖ్యలు ఆయన అజ్ఞానం తెలియజేస్తున్నాయన్నారు. కుల, మతాలకు అతీతంగా అన్ని వర్గాల వారు అభిమానించే గొప్ప నాయకురాలిగా జయలలిత జీవించారని అన్నారు. ప్రజల కోసం జీవితాన్ని అర్పించారని గుర్తు చేశారు. అలాంటి గొప్ప నాయకురాలిని ప్రత్యేక మతానికో, కులానికో పరిమితం చేయలేరని తెలిపారు.