ఈవీఎంలు వచ్చేశాయ్‌..

ఈవీఎం పెట్టెలను పరిశీలిస్తున్న రిటర్నింగ్‌ అధికారి జయరామ్‌

నర్సీపట్నం అర్బన్‌, చోడవరం, న్యూస్‌టుడే: నియోజకవర్గ కేంద్రాలకు ఈవీఎంలు వచ్చేశాయి.. వాటిని నర్సీపట్నం ప్రభుత్వం డిగ్రీ కళాశాల, చోడవరం మండలం గాంధీ గ్రామంలోని ప్రభుత్వ ఉన్నత పాఠశాలలో పటిష్ఠ బందోబస్తు, సీసీ కెమెరాల నిఘా మధ్య భద్రపరిచారు. నర్సీపట్నం నియోజకవర్గానికి సంబంధించి తొలివిడతగా శనివారం 340 వీవీ ప్యాట్స్‌, 314 బ్యాలెట్‌ యూనిట్లు, 314 కంట్రోల్‌ యూనిట్‌లు వచ్చాయి. మధ్యాహ్నం ఒంటిగంట సమయంలో అనకాపల్లి నుంచి కంటైనర్‌లో వీటిని తీసుకువచ్చారు. కంటెనర్‌ లోపలకు రావడానికి కళాశాల ముఖద్వారం బోర్డు అడ్డుగా ఉండటంతో దాన్ని తొలగించి వాహనాన్ని లోపలకు తీసుకువచ్చారు. తెదేపా, భాజపా, వైకాపా నాయకుల సమక్షంలో రిటర్నింగ్‌ అధికారి జయరామ్‌, అసిస్టెంట్‌ రిటర్నింగ్‌ అధికారి శ్రీరాములు, సీఐ కాంతికుమార్‌ సీల్‌ తొలగించి పెట్టెలను గదిలో చేర్చారు. చోడవరం నియోజకవర్గానికి సంబంధించి 291 కంట్రోల్‌ యూనిట్లు, 291 బ్యాలెట్‌ యూనిట్లు, 315 వీవీ ప్యాట్స్‌ వచ్చాయని ఎన్నికల అధికారి చిన్నికృష్ణ చెప్పారు. తెదేపా, భాజపా, వైకాపా నాయకులు దేవరపల్లి సత్య, బొడ్డేడ గంగాధర్‌, అమర్‌, దొడ్డి వెంకట్‌ వీటిని పరిశీలించారు.