రూ.2.2 కోట్ల ఖర్చు.. నాణ్యత తీసికట్టు!

నెల తిరక్కముందే దెబ్బతిన్న బైపాస్‌రోడ్డు
జగన్‌ పాలనలో రోడ్ల నిర్మాణం దుస్థితి

నారాయణపురం సమీపంలో దెబ్బతిన్న తారురోడ్డు

ఈనాడు అనకాపల్లి, ఎలమంచిలి న్యూస్‌టుడే: ఎలమంచిలి నియోజవర్గంలో రూ.కోట్లు ఖర్చుచేసి నిర్మించిన రోడ్లలో నాణ్యతకు తూట్లు పొడుస్తున్నారు. కొత్తగా వేసిన రోడ్లు నెలతిరక్క ముందే దెబ్బతింటున్నాయి. పర్యవేక్షణ లోపం, పనుల్లో నాణ్యత కొరవడడమే కారణమనే ఆరోపణలు వినిపిస్తున్నాయి.

• ఎలమంచిలి-అచ్యుతాపురం బైపాస్‌ రోడ్డు రూ.2.20 కోట్ల వ్యయంతో నెల రోజుల కిందట మరమ్మతులు చేపట్టారు. 20 రోజుల కిందట ఈ రోడ్డుపై కొత్తగా రోడ్డు వేశారు. గోతులతో ప్రయాణికులు పడుతున్న కష్టాలు తీరాయని సంతోషపడేలోగా తిరిగి రోడ్డు దెబ్బతింది. ఎలమంచిలి నుంచి మామిడివాడ వంతెన వరకు కొత్తగా తారు రోడ్డు వేశారు. బాగా దెబ్బతిన్న చోట రెండు లేయర్లు, మిగిలిన చోట ఒక లేయరు తారు రోడ్డు వేశారు. ఈ పనులు ఇటీవల పూర్తయ్యాయి. కొత్తగా వేసిన రోడ్డు నారాయణపురం సమీపంలో దెబ్బతింది. రోడ్డు తెగిపోయి ముందుకు జారిపోతోంది. ఈ రోడ్డుపై ద్విచక్ర వాహనాలు పార్కింగ్‌ చేస్తే రోడ్డు గొయ్యి పడుతోంది. నిర్మాణంలో నాణ్యతలోపం కారణంగానే ఇలా రోడ్డు దెబ్బతిందని వాహనచోదకులు  ఆగ్రహం వ్యక్తం చేస్తున్నారు. దెబ్బతిన్న చోట మళ్లీ రోడ్డు పనులు చేపట్టాలని కోరుతున్నారు.