సింహగిరిపై వైభవంగా తిరువీధి ఉత్సవం

వేణుగోపాలుడి అలంకరణలో దేవేరులతో స్వామివారు

సింహాచలం, న్యూస్‌టుడే: సింహగిరిపై జరుగుతున్న అప్పన్న స్వామి వార్షిక కల్యాణోత్సవాల్లో భాగంగా ఆదివారం సాయంత్రం తిరువీధి ఉత్సవం వైభవోపేతంగా జరిగింది. సర్వజన మనోరంజని వాహనంలో వేణుగోపాలుడి అలంకరణలో ఉన్న గోవిందరాజ స్వామిని దర్శించుకున్న భక్తజనం ఆనంద పరవశులయ్యారు. తొలుత అర్చకులు స్వామివారి ఉత్సవమూర్తి గోవిందరాజ స్వామిని శ్రీదేవి, భూదేవి సమేతంగా పట్టు పీతాంబరాలు, పూలమాలలతో శోభాయమానంగా అలంకరించారు. సర్వజన మనోరంజని వాహనంపై దేవతామూర్తులను అధిష్ఠింపజేసి సింహగిరి మాడవీధుల్లో ఊరేగించారు.  తిరువీధిలో కళాకారులు ప్రదర్శించిన శాస్త్రీయ నృత్యాలు అలరించాయి. ఈవో సింగల శ్రీనివాసమూర్తి  పర్యవేక్షించారు.