విశాఖలో లైంగిక వేధింపులు

రేడియాలజీ విభాగాధిపతిపై విద్యార్థినుల ఫిర్యాదు

ఎండాడ, న్యూస్‌టుడే: తగరపువలస సమీప సంగివలస ఎన్‌ఆర్‌ఐ కళాశాలకు చెందిన ఓ ఉద్యోగి లైంగిక వేధింపులకు పాల్పడినట్లు బాధిత విద్యార్థినులు గురువారం దిశా పోలీసుస్టేషన్‌లో ఫిర్యాదు చేశారు. బాధితులు, పోలీసులు తెలిపిన వివరాలిలా.. సంబంధిత కళాశాల బీఎస్సీ రేడియాలజీ విభాగంలో ఈ ఏడాది 16 మంది విద్యార్థినీ, విద్యార్థులు ప్రవేశం పొందారు. జనవరి 23 నుంచి తరగతులు ప్రారంభమై ఈ నెల 12వ తేదీ వరకు జరిగాయి. 13న ఎన్నికలు జరిగినందున 14 నుంచి 28వ తేదీ వరకు వేసవి సెలవులు ప్రకటించారు. అయితే ఈనెల 3వ తేదీన కళాశాలలో తరగతులు జరుగుతున్నపుడు రేడియాలజీ విభాగాధిపతి టి.నాగేశ్వరరావు తమపై లైంగిక వేధింపులకు పాల్పడ్డారని కళాశాల డీన్‌ పి.వి.సుధాకర్‌కు బాధిత విద్యార్థినులు ఫిర్యాదు చేశారు. 20 రోజులైనా ఎలాంటి చర్యలు లేకపోవడంతో దిశా పోలీసులను ఆశ్రయించారు. ఏసీపీ వివేకానంద ఆదేశాల మేరకు సీఐ కల్యాణి విచారణ చేపట్టారు. ముగ్గురు విద్యార్థినులు ఫిర్యాదు చేశారని, ఆ మేరకు కేసు నమోదు చేసి చర్యలు చేపడతామని సీఐ పేర్కొన్నారు. ఈ విషయమై డీన్‌ సుధాకర్‌ వద్ద ప్రస్తావించగా..ఈ అంశం కళాశాల అంతర్గత ఫిర్యాదుల కమిటీకి నివేదించామన్నారు. వేసవి సెలవుల కారణంగా, సభ్యులు అందుబాటులో లేక సంబంధిత కమిటీ ఆలస్యంగా విచారణ చేపట్టిందన్నారు. ఆ ప్రక్రియ పూర్తయిన వెంటనే చర్యలు తీసుకుంటామని ఆయన పేర్కొన్నారు.