ట్రాయ్‌ పేరిట సైబర్‌ వల

ఎం.వి.పి.కాలనీ, న్యూస్‌టుడే : సైబర్‌ మోసగాళ్లు ట్రాయ్‌ పేరిట పలువురికి ఫోన్లు చేసి బెదిరింపులకు దిగి, వారి నుంచి దొరికినంత దోచేస్తున్నారని, ఈ తరహా ఫోన్లపట్ల అప్రమత్తంగా ఉండాలని పోలీసులు హెచ్చరిస్తున్నారు. టెలిఫోన్‌ రెగ్యులేటరీ అథారిటీ ఆఫ్‌ ఇండియా (ట్రాయ్‌) కాల్‌సెంటర్‌ నుంచి మాట్లాడుతున్నట్లు పలువురికి ఫోన్లు చేసి ‘మీరు వినియోగిస్తున్న ఫోన్‌నెంబరు దేశ వ్యతిరేక కార్యకలాపాలకు వాడుతున్నట్లు గుర్తించాం. మీపై ఎఫ్‌ఐఆర్‌ నమోదైంది’ అని బెదిరింపులకు దిగుతున్నారన్నారు. తర్వాత వీడియో కాల్‌లో ఒక నకిలీ పోలీసుతో మాట్లాడించి.. అరెస్టు నిరోధించడానికి కొంత మొత్తం బదిలీ చేయాలని డిమాండ్‌ చేస్తున్నారన్నారు. ఆ తర్వాత బాధితుని వివరాలను సేకరించి, వారి ఖాతా నుంచి దొరికినంత దోచేస్తున్నట్లు ఫిర్యాదులు వస్తున్నాయన్నారు. ఈ తరహా ఫోన్లు వస్తే వెంటనే 1930కు సమాచారం ఇవ్వాలని పోలీసులు కోరారు.