సైబర్‌ నేరగాళ్ల నుంచి ఎట్టకేలకు విముక్తి

కాంబోడియా నుంచి భారత్‌కు 60 మంది
ఫలించిన రాయబార కార్యాలయ అధికారుల కృషి

కాంబోడియా నుంచి భారత్‌కు బయలుదేరిన బృందంలోని యువకులు

గోపాలపట్నం, ఎంవీపీ కాలనీ, న్యూస్‌టుడే: ఉద్యోగాల పేరుతో యువతను మోసగించి... వారిని అష్టకష్టాలపాల్జేసి... సైబర్‌ నేరాలు చేయించే కాంబోడియాలోని ముఠాల బారి నుంచి పలువురు ఎట్టకేలకు బయటపడ్డారు. భారత్‌ యువకులు కాంబోడియాలోని చైనా దేశీయుల ఉచ్చులో చిక్కి నరక యాతన అనుభవిస్తున్నారని ఇటీవల విశాఖ సీపీ రవిశంకర్‌ వెల్లడించారు. ఆ నేరగాళ్ల బారి నుంచి తప్పించుకొచ్చిన విశాఖ వాసి ఒకరు ఇచ్చిన సమాచారంతో దారుణ వాస్తవాలు వెలుగులోకి వచ్చాయి. విశాఖకు చెందిన దాదాపు 150 మంది, దేశ వ్యాప్తంగా దాదాపు ఐదు వేల మంది కాంబోడియాలో మోసగాళ్ల బారినపడినట్లు అక్కడి భారత రాయబార కార్యాలయానికి విశాఖ సీపీ సమాచారమిచ్చారు. దీంతో స్థానిక అధికారులతో సంప్రదింపులు కొంత ఫలితమిచ్చాయి. అలాగే...కొద్ది రోజుల కిందట పెద్ద సంఖ్యలో యువకులు ముఠాలకు వ్యతిరేకంగా కాంబోడియాలో ఆందోళనకు దిగగా... కొందరిని పోలీసులు అరెస్టు చేశారు. వీరిలో దాదాపు 60 మంది తొలివిడతగా రాయబార కార్యాలయ అధికారుల కృషితో గురువారం భారత్‌కు బయలుదేరినట్లు విశాఖ పోలీసులకు  సమాచారం అందింది. ఈ విషయం తెలిసిన యువకుల కుటుంబ సభ్యులు వారి రాక కోసం ఆశగా ఎదురుచూస్తున్నారు.