చెట్టు నీడే గతి..అదే విశ్రాంతి గది!!

రెడ్‌క్రాస్‌ ఆధ్వర్యంలో ఏర్పాటు చేసిన గుడారం 

కేజీహెచ్‌లో నవజాత శిశు సంరక్షణ కేంద్రం (ఎస్‌ఎన్‌సీయూ-2) వద్ద శిశువుల తల్లులు, బంధువులు వేచి ఉండేందుకు గదులు లేవు. శిశువుల తల్లులు అందుబాటులో ఉండాలంటే ఇక్కడి చెట్ల నీడే గతి.  తీవ్ర ఉక్కపోతలో చెట్ల కింద తమతో తెచ్చుకున్న చాపలపైనే కూర్చుని వేచి ఉండాల్సిన దుస్థితి. మండుటెండల్లో ఉక్కపోత భరించలేక విసనకర్రలతో సేద తీరుతున్నారు.కనీస సౌకర్యాలు లేక నానా అగచాట్లు పడుతున్నారు. ఇటీవల రెడ్‌క్రాస్‌ సంస్థ చిన్నపాటి గుడారాన్ని సమకూర్చినా.. అందులో ఎటువంటి సౌకర్యాలు లేవు. కొద్ది మందికి మాత్రమే ఇది సరిపోతుంది. నిత్యం ఉత్తరాంధ్ర నలుమూలల నుంచి ఈ విభాగానికి నవజాత శిశువులతో చికిత్స కోసం వచ్చే బాలింతల దుస్థితికి కేజీహెచ్‌లో పరిస్థితే నిదర్శనం. ఉన్నతాధికారులు స్పందించి త్వరితగతిన సౌకర్యాలు కల్పించాలని ఇక్కడికి వచ్చిన వారు కోరుతున్నారు.

కేజీహెచ్‌లో ఆరుబయట చెట్టు కింద వేచి ఉన్న నవజాత శిశువుల కుటుంబీకులు

ఈనాడు, విశాఖపట్నం