ప్రధానోపాధ్యాయినిపై ఎమ్మెల్యే ఆగ్రహం

ఎలమంచిలి పట్టణం, న్యూస్‌టుడే: ఇంటర్‌ విద్యార్థులను నేలపై కూర్చోబెట్టి పరీక్షలు రాయించడంపై ఎలమంచిలి బాలికోన్నత పాఠశాల ప్రధానోపాధ్యాయిని హిమబిందుపై ఎమ్మెల్యే రమణమూర్తి రాజు ఆగ్రహం వ్యక్తం చేశారు. ఈనెల 28న ఈ పాఠశాలలో సుమారు 600 మంది హైస్కూల్‌ విద్యార్థులు, 40 ఇంటర్‌, మరో 60 మంది ప్రాథమిక విద్యార్ధులు ఉన్నారు. అదే రోజు ఉపాధ్యాయులకు శిక్షణకు రెండు గదులు కేటాయించారు. దీంతో ఇంటర్‌ విద్యార్థులను స్థలాభావంతో నేలపై కూర్చోబెట్టారు. ఈ సమస్యను స్థానికులు ఎమ్మెల్యే దృష్టికి తీసుకువచ్చారు. బుధవారం ఆసుపత్రి భవనాలను ప్రారంభించేందుకు ఎలమంచిలి వచ్చిన ఎమ్మెల్యే పాఠశాల హెచ్‌ఎంను రోడ్డుపైకి పిలిపించి ఆగ్రహం వ్యక్తం చేశారు. విద్యార్థులను నేలపై కూర్చోబెట్టి ఎలా పరీక్ష రాయిస్తారని ప్రశ్నించారు. ‘ఎక్కడ నుంచి వచ్చావ్‌.. నా సంగతి తెలియదా’? అంటూ మండిపడ్డారు.