బీసీగేటు దారి.. నిత్యం సవారీ..!

న్యూస్‌టుడే, పెదగంట్యాడ: నిత్యం రద్దీగా ఉండే గాజువాక- స్టీల్‌ప్లాంట్‌ బీసీగేటు ప్రధాన రహదారికి ఇరువైపులా అనధికార వాహనాల పార్కింగ్‌తో ట్రాఫిక్‌ స్తంభిస్తోంది. దీంతో నిత్యం విధులకు వెళ్లే ఉక్కు కార్మికులు నరకయాతన అనుభవిస్తున్నారు. గంగవరం పైవంతెన మొదలుకొని సీతానగరం కొండ, బీసీ గేటు వరకు ట్యాంకర్లు, లారీలు, టిప్పర్లు, కాంక్రీట్‌ మిక్చర్‌ వాహనాలు నిలిపి ఉంచుతున్నారు. రాత్రి సమయంలో ద్విచక్ర వాహనచోదకులు ప్రమాదాల బారిన పడుతున్నారు. అధికారులు స్పందించి... అనధికార పార్కింగ్‌పై చర్యలు తీసుకోవాలని పలువురు కోరుతున్నారు.