ప్రొటోకాల్‌ కుర్చీ మడతపెట్టడంతో మంత్రికి షాక్‌

పోస్టు డబ్బా వద్ద కోడిగుడ్లు చూపుతున్న బాలాజీ తదితరులు

లక్ష్మీదేవిపేట (అనకాపల్లి), న్యూస్‌టుడే: విశాఖకు వీఐపీలు ఎవరు వచ్చినా.. వారికి స్వాగతం పలికేందుకు ప్రొటోకాల్‌ బాధ్యతల నుంచి మంత్రి గుడివాడ అమర్‌నాథ్‌ను సీఎం జగన్‌ తప్పించడంతో మతిభ్రమించి ప్రతిపక్ష నాయకులపై అనుచిత వ్యాఖ్యలు చేస్తున్నారని తెదేపా రాష్ట్ర కార్యదర్శి కోట్ని బాలాజీ విమర్శించారు. ప్రొటోకాల్‌ కుర్చీని సీఎం మడతపెట్టడంతో కోడిగుడ్డు మంత్రి షాక్‌ నుంచి కోలుకోలేకపోతున్నారని ఎద్దేవా చేశారు. పట్టణంలోని తపాలా కార్యాలయం నుంచి మంత్రి అమర్‌నాథ్‌కు గురువారం కోడిగుడ్లు పోస్టల్‌లో పంపారు. అనంతరం బాలాజీ మాట్లాడుతూ.. కోడిగుడ్డు మంత్రికి అనకాపల్లి టికెట్‌ కూడా లేకుండాపోయిందన్నారు. ఇటీవల సీఎం కుర్చీలో కూర్చుని అధికారులతో సమీక్ష నిర్వహించడం వల్లే అమర్‌పై జగన్‌కు కోపం వచ్చి కుర్చీని మడత పెట్టారన్నారు. నాయకులు కర్రి బాబీ, జగ్గారావు, సత్యనారాయణ, సూర్య, విజయ్‌, పృథ్వీ, ప్రదీప్‌, హరీశ్‌ పాల్గొన్నారు.