ఎన్నాళ్లకెన్నాళ్లకు..!!

విశాఖకు రెండు ఐపీఎల్‌ మ్యాచ్‌లు కేటాయింపు

విశాఖ క్రీడలు, న్యూస్‌టుడే: క్రికెట్‌ అభిమానులకు శుభవార్త. రెండు ఐపీˆఎల్‌ మ్యాచ్‌లకు నగరం వేదికకానుంది. గురువారం ‘ఐపీఎల్‌ 2024’ షెడ్యూలును నిర్వాహకులు ప్రకటించారు. పీఎంపాలెంలో ఏసీఏ-వీడీసీఏ అంతర్జాతీయ స్టేడియంలో మార్చి 31న దిల్లీ క్యాపిటల్స్‌ -చెన్నై సూపర్‌కింగ్స్‌ జట్లు తలపడనున్నాయి. ఏప్రిల్‌ 3న దిల్లీ క్యాపిటల్స్‌- కోల్‌కతా నైట్‌రైడర్స్‌ జట్లు ఆడనున్నాయి. విశాఖ క్రికెట్‌ ప్రేమికులు ఐపీఎల్‌ మ్యాచ్‌లు తిలకించి నాలుగేళ్ల అవుతుంది. ప్రతి సంవత్సరం ఐపీఎల్‌ షెడ్యూలు విడుదలవడం ... అందులో విశాఖకు మ్యాచ్‌లు కేటాయించకపోవడంతో నిరాశలో మునిగిపోయేవారు. ఈసారి రెండు మ్యాచ్‌లు విశాఖలో జరగనుండటంతో అభిమానులు ఎంతో సంతోషిస్తున్నారు. అభిమాన క్రికెటర్లను తిలకించేందుకు, బౌండరీలు, సిక్సర్లు బాదే వారి ఆటను ఆస్వాదించేందుకు క్రికెట్‌ ప్రేమికులు సిద్ధమవుతున్నారు. ఈ సీజన్‌లో విశాఖకు రెండు మ్యాచ్‌లు కేటాయించడంతో దిల్లీ క్యాపిటల్స్‌ కోఓనర్స్‌ కిరణ్‌కుమార్‌, జిందాల్‌కు ఏసీఏ అధ్యక్ష, కార్యదర్శులు పి.శరత్‌చంద్రారెడ్డి, ఎస్‌.ఆర్‌. గోపీనాథరెడ్డిలు కృతజ్ఞతలు తెలిపారు. ఇటీవల కాలంలో విశాఖ స్టేడియంలో రెండు మ్యాచ్‌లు జరిగాయి. భారత్‌, ఇంగ్లండ్‌ టెస్ట్‌ మ్యాచ్‌ తిలకించేందుకు పెద్ద సంఖ్యలో అభిమానులు తరలివచ్చారు. నాలుగు రోజుల పాటు కోలాహలం నెలకొంది. గత ఏడాది నవంబరులో జరిగిన భారత్‌- ఆస్ట్రేలియా టీ-20 కూడా అభిమానులను ఉర్రూతలూగించింది.