సెంట్రల్‌ పార్కు కళ తప్పింది

ఈనాడు, విశాఖపట్నం: నగర నడిబొడ్డున ఉన్న సెంట్రల్‌ పార్కు కళ తప్పింది. సందర్శకుల నుంచి టికెట్ల రూపంలో డబ్బులు వసూలు చేస్తున్నా.. సౌకర్యాల మెరుగుదలకు ఎలాంటి చర్యలూ చేపట్టడం లేదు. చిన్న పిల్లలకోసం ఏర్పాటు చేసిన ఆట వస్తువులు దెబ్బతిన్నాయి. దీప స్తంభాలు వెలవెలబోతున్నాయి. నడకదారి దెబ్బతింది. పచ్చదనం కోల్పోయిన గార్డెన్లు, కళాకృతులు కళ తప్పాయి. బోన్సాయి వనంలో మొక్కల కుండీలు దెబ్బతిన్నాయి. పార్కు మధ్య ప్రాంతంలో కనీసం పచ్చదనం లేక పోవడమేకాక వ్యర్థాలను తగులబెట్టడంతో బూడిద దర్శనమిస్తోంది. ప్రధాన బస్‌స్టాండు దగ్గర్లో ఉండటంతో నిత్యం సందర్శకుల తాకిడి ఉంటుంది. దానికి తగ్గట్లుగా ఇక్కడ సౌకర్యాలు లేకపోవడంతో సందర్శకులు పెదవి విరుస్తున్నారు.