‘కేసీఆర్‌ కుటుంబం జైలుకెళ్లడం ఖాయం’

మాట్లాడుతున్న తీన్మార్‌ మల్లన్న, చిత్రంలో ఎమ్మెల్యే రాజేందర్‌రెడ్డి, నాయకులు

నయీంనగర్, న్యూస్‌టుడే: కేసీఆర్‌ కుటుంబమంతా ఒక దొంగల ముఠా అని, జూన్‌ 4 తర్వాత అందరూ చర్లపల్లి జైలుకెళ్లడం ఖాయమని పట్టుభద్రుల ఎమ్మెల్సీ కాంగ్రెస్‌ అభ్యర్థి తీన్మార్‌ మల్లన్న అన్నారు. శుక్రవారం హనుమకొండ కాంగ్రెస్‌ భవన్‌లో పార్టీ డివిజన్‌ అధ్యక్షులు, ప్రజా ప్రతినిధులు, యువజనులతో ఎమ్మెల్యే నాయిని రాజేందర్‌రెడ్డి అధ్యక్షతన ఆత్మీయ సమ్మేళనం నిర్వహించారు. తీన్మార్‌ మల్లన్న ప్రసంగిస్తూ.. మాజీ మంత్రి కేటీఆర్‌ నగరానికి వచ్చి తనను దొంగ అని సంబోధించారని, అసలు వారిదే దొంగల కుటుంబమని అన్నారు. తనను బ్లాక్‌మెయిలర్‌గా ఈ నెల 27 వరకు నిరూపిస్తే పోటీ నుంచి తప్పుకుంటానని కేటీఆర్‌కు సవాల్‌ విసిరారు. జేఎన్‌టీయూ, ఓయూ, కేయూలో అభ్యసించిన వారిని పల్లీబఠానీలు అమ్ముకునేవారితో పోలిస్తే గుణపాఠం తప్పదని హెచ్చరించారు. వక్ఫ్‌బోర్డ్‌ ఛైర్మన్‌ అజ్మతుల్లా, ఏఐసీసీసీ జార్డినేటర్‌ డా.కత్తి వెంకటస్వామిగౌడ్, రాష్ట్ర గ్రంథాలయ సంస్థ ఛైర్మన్‌ డా.రియాజ్, టీపీసీసీ సభ్యుడు బత్తిని శ్రీనివాస్, జిల్లా మహిళా అధ్యక్షురాలు సరళ పాల్గొన్నారు.