లోక్‌సభ ఎన్నికలకు సిద్ధంగా ఉండాలి

సమీక్ష సమావేశంలో మాట్లాడుతున్న ఎస్పీ సంగ్రామ్‌ సింగ్‌ జీ పాటిల్‌

నెహ్రూసెంటర్‌, న్యూస్‌టుడే: త్వరలో జరగనున్న లోక్‌సభ ఎన్నికలకు పోలీసు అధికారులు, సిబ్బంది సిద్ధంగా ఉండాలని ఎస్పీ సంగ్రామ్‌ సింగ్‌ జి పాటిల్‌ సూచించారు. గురువారం జిల్లా కేంద్రంలోని పట్టణ ఠాణా సమావేశ మందిరంలో నెలవారీ సమీక్ష సమావేశం ఏర్పాటు చేశారు. కార్యక్రమానికి హాజరైన ఎస్పీ జిల్లా పరిధిలోని ఆయా పోలీస్‌ స్టేషన్ల పరిధిలో పెండింగ్‌, విచారణలో ఉన్న కేసుల వివరాలను తెలుసుకున్నారు. అనంతరం మాట్లాడుతూ సకాలంలో దర్యాప్తు చేసి నేరస్థులను న్యాయస్థానంలో హాజరు పర్చాలన్నారు. అదృశ్యం కేసులపై ప్రత్యేక దృష్టి సారించాలని ఆదేశించారు. మార్చి 9న జరిగే జాతీయ మెగా లోక్‌ అదాలత్‌లో  ఎక్కువ కేసులు పరిష్కారమయ్యేలా చూడాలన్నారు. ప్రజలు సీసీ కెమెరాలు ఏర్పాటు చేసుకునేలా గ్రామాల్లో అవగాహన కల్పించాలని కోరారు. పోలీస్‌ అధికారులు సిబ్బంది విధి నిర్వహణలో అలసత్వం చూపరాదన్నారు. జిల్లా సరిహద్దులు, ఠాణాల పరిధిలో ముమ్మర తనిఖీలు నిర్వహించి ఎలాంటి అక్రమ రవాణా జరగకుండా చూడాలని సూచించారు. సమావేశంలో అదనపు కలెక్టర్‌ జోగుల చెన్నయ్య, శిక్షణ ఐపీఎస్‌ పండరి చేతన్‌ నితిన్‌, మహబూబాబాద్‌ డీఎస్పీ తిరుపతిరావు, తొర్రూరు డీఎస్పీ సురేష్‌, సీఐలు, ఎస్సైలు సిబ్బంది పాల్గొన్నారు.