కాసుల ఖాకీ..!

ఈనాడు, మహబూబాబాద్‌:  నిష్పక్షపాతంగా సేవలు అందించాల్సింది పోయి ఓ పోలీసు అధికారి కాసులకు కక్కురి పడ్డారు. మహబూబాబాద్‌ సబ్‌ డివిజన్‌ పరిధిలోని ఒక ప్రధాన పోలీస్‌స్టేషన్‌లో ఇటీవల బాధ్యతలు స్వీకరించిన ఒక ఎస్సై వాహనం దొంగతనం కేసులో ముడుపులు తీసుకుని నిందితుడిని ఇంటికి పంపించినట్లు విశ్వసనీయంగా తెలిసింది. జిల్లాలోని ఒక ఎక్సైజ్‌ స్టేషన్‌ అధికారులు గుడుంబా బెల్లాన్ని తరలిస్తున్న వాహనాన్ని పట్టుకుని తమ ఆధీనంలో పెట్టుకున్నారు. ఇటీవల వాహనం చోరీకి గురవ్వడంతో అధికారులు పోలీసు స్టేషన్‌లో ఫిర్యాదు చేశారు. కేసు నమోదు చేసిన పోలీసులు వాహనాన్ని అపహరించిన వ్యక్తిని పట్టుకుని స్టేషన్‌కు తీసుకొచ్చారు. దాన్ని యజమానే దొంగలించాడని సమాచారం. అతడి అమాయకత్వాన్ని ఆసరా చేసుకుని రిమాండ్‌ పేరుతో ఆసుపత్రికి తీసుకెళ్లి వైద్యపరీక్షలు చేయించారు. తర్వాత  రిమాండ్‌కు వెళ్లకుండా ఉండాలంటే తమకు కొంత డబ్బులు ఇవ్వాలని డిమాండ్‌ చేశారు. నిందితుడి నుంచి రూ.80 వేల వరకు వసూలు చేసి స్టేషన్‌ బెయిల్‌ ఇచ్చి ఇంటికి పంపినట్లు ఆరోపణలు వస్తున్నాయి. ఈ వ్యవహారమంతా ఒక కానిస్టేబుల్‌ ద్వారా నడిపించినట్లు తెలిసింది.