ఆశ.. నిరాశైన వేళ..

సిద్దిపేట జిల్లా ములుగులో తాటికొండ రాజయ్య

ములుగు, న్యూస్‌టుడే: భారాస తరఫున వరంగల్‌ ఎంపీ టికెట్‌ తనకు ఇస్తారని.. సంబంధిత ప్రకటన వెలువడగానే మాజీ సీఎం కేసీఆర్‌ను ఎర్రవల్లి వ్యవసాయ క్షేత్రంలో కలవాలనే ఆశతో వచ్చిన మాజీ ఎమ్మెల్యే తాటికొండ రాజయ్య శుక్రవారం సాయంత్రం నిరాశతో వెనుదిరిగి వెళ్లిపోయారు. అభ్యర్థిగా హనుమకొండ జడ్పీ ఛైర్మన్‌ మారేపల్లి సుధీర్‌కుమార్‌ను ప్రకటించారని తెలియడంతో అప్పటివరకు సిద్దిపేట జిల్లా ములుగు మండల కేంద్రంలో ఎదురుచూస్తున్న రాజయ్య విలేకరులతో ఏమీ మాట్లాడకుండానే వెళ్లిపోయారు. గతంలో రాజయ్య భారాసను వీడారు. వరంగల్‌కు కాంగ్రెస్‌ నుంచి కడియం శ్రీహరి కుమార్తె కావ్యను అభ్యర్థిగా ప్రకటించినపుడు.. మళ్లీ రాజయ్య భారాసలో చేరుతారని, టికెట్‌ ఆయనకే కేటాయిస్తారనే ప్రచారం జరిగింది.