సూర్యకిరణ ఉషస్సు.. శ్రీనివాసుని తేజస్సు

కనులపండువగా కల్యాణ మహోత్సవాలు
యోగశ్రీనివాసుని అలంకారంలో స్వామివారు

సూర్యప్రభ వాహనంపై గ్రామోత్సవం

ద్వారకాతిరుమల, న్యూస్‌టుడే: ద్వారకాతిరుమల శేషాచల పర్వతంపై కొలువుతీరిన శ్రీవేంకటేశ్వరస్వామి వైశాఖ మాస తిరు కల్యాణ మహోత్సవాలు కనులపండువగా కొనసాగుతున్నాయి. మూడో రోజు సోమవారం ఉదయం సూర్యప్రభ వాహనంపై శ్రీదేవి భూదేవి సమేత  శ్రీనివాసుని గ్రామోత్సవం నేత్రపర్వంగా సాగింది. అంతకుముందు స్వామి, అమ్మవార్లను సూర్యప్రభ వాహనంపై కొలువుదీర్చి విశేషంగా అలంకరించారు. ఆపై ఆలయ అర్చకులు విశేష హారతులు సమర్పించారు. ఉదయం సూర్యకిరణాలు ప్రసరిస్తుండగా- ఉభయ దేవేరుల సమేత శ్రీవారు సూర్యప్రభ వాహనాన్ని అధిరోహించి తేజోవిరాజితుడై పుర వీధుల్లో విహరించారు. భక్తులు స్వామివారికి కర్పూర హరతులతో నీరాజనాలు పలికారు.

ఆకట్టుకున్న సాంస్కృతిక ప్రదర్శనలు.. ఆలయ తూర్పు వైపున శ్రీహరి కళా తోరణంలో నిర్వహిస్తున్న సాంస్కృతిక కార్యక్రమాలు భక్తులను విశేషంగా అలరిస్తున్నాయి. ఈ ప్రదర్శనలను తిలకిస్తూ భక్తులు ఆధ్యాత్మిక తన్మయత్వం పొందుతున్నారు. కల్యాణ మహోత్సవాల్లో భాగంగా శేషాచల పర్వతం విద్యుద్దీప శోభతో అలరారుతోంది. ఆలయంపై వివిధ విద్యుద్దీప అలంకరణలు చూపరులను ఆకట్టుకుంటున్నాయి. మంగళవారం ఉదయం 7 గంటలకు హనుమద్వాహనంపై స్వామివారు విహరించనున్నారు. రాత్రి 7 గంటలకు ఎదుర్కోలు ఉత్సవం, 8.30 గంటలకు వెండి శేష వాహనంపై స్వామివారి గ్రామోత్సవం జరగనుంది.