పోలింగ్‌ శాతం పెంచడమే లక్ష్యం

ఈవీఎంల వినియోగంపై అవగాహన కల్పిస్తున్న డీపీవో శ్రీనివాస్‌ విశ్వనాథ్‌ తదితరులు

ఏలూరు టూటౌన్‌, న్యూస్‌టుడే: ఓటర్లను చైతన్యవంతం చేసి వచ్చే ఎన్నికల్లో జిల్లాలో పోలింగ్‌ ను 92 శాతానికి పెంచటమే లక్ష్యంగా స్వీప్‌ కార్యక్రమాలు నిర్వహిస్తున్నామని తూతిక శ్రీనివాస్‌ విశ్వనాథ్‌ అన్నారు. ఏలూరు లోని నగర పాలక సంస్థ కార్యాలయ సమావేశ మందిరంలో శుక్రవారం నిర్వహించిన కార్యక్రమానికి స్వీప్‌ నోడల్‌ అధికారి అయిన శ్రీనివాస్‌ విశ్వనాథ్‌ ముఖ్య అతిథిగా హాజరై మాట్లాడారు. జిల్లా కలెక్టర్‌ ప్రసన్న వెంకటేశ్‌ ఆదేశాల మేరకు జిల్లా వ్యాప్తంగా విరివిగా వీటిని నిర్వహిస్తున్నామన్నారు. పట్టణ ప్రాంతాల్లో ఓటింగ్‌ శాతం పెంచేందుకు ఓటు హక్కు వినియోగం పై అవగాహన కల్పించేందుకు ఇది ఎంతగానో ఉపయోగపడుతుందన్నారు. ప్రజలు స్వేచ్ఛాయుత వాతావరణంలో తమ ఓటు హక్కు నిర్భయంగా వినియోగించుకోవాలన్నారు. పోలింగ్‌ రోజుల విధిగా పోలింగ్‌ కేంద్రానికి వెళ్లాలని ఓటు వేయాలన్నారు. ఓటు హక్కు వినియోగించుకోవటం ప్రతి పౌరుడి బాధ్యత అని వృద్ధులకు వికలాంగులకు పోలింగ్‌ కేంద్రాల వద్ద అవసరమైన సౌకర్యాలను ఏర్పాటు చేస్తున్నామన్నారు. అడిషనల్‌ కమిషనర్‌ చంద్రయ్య, అసిస్టెంట్‌ లేబర్‌ కమిషనర్‌ నాగేశ్వరరావు, అసిస్టెంట్‌ సిటీ ప్లానర్‌ తిరుపతిరావు తదితరులు పాల్గొన్నారు. పలువురికి ఓటు హక్కు వినియోగంపై, ఈవీఎంల వినియోగంపై అవగాహన కల్పించారు.