ఇటు వృథా.. అటు వ్యధ..!

అల్లూరి సీతారామరాజు కాలనీలో ఇంటింటా ఏర్పాటు చేసుకున్న డ్రమ్ములు

ఏలూరులోని అల్లూరి సీతారామరాజుకాలనీ, నల్లదిబ్బ ప్రాంతాల్లో ప్రజలు తాగునీటికి అవస్థలు పడుతున్నారు. ఏ ఇంటి ముందు చూసినా డ్రమ్ములు, బిందెలు కనిపిస్తున్నాయి. ఇంటింటికీ తాగునీటి కుళాయిలు ఏర్పాటు చేస్తామని గత ఎన్నికల ముందు ఇచ్చిన హామీ నేటికీ అమలు కాలేదని స్థానికులు ఆవేదన వ్యక్తం చేస్తున్నారు. పలుమార్లు నగర పాలక సంస్థ అధికారులకు అర్జీలిచ్చినా ప్రయోజనం కనిపించడం లేదని అంటున్నారు. ట్యాంకర్ల కోసం ప్రజలు ఎదురుచూడటం పరిపాటిగా మారింది. అలాగే  జయప్రకాశ్‌నగర్‌, నాగేశ్వరపురం, రామానగర్‌ కాలనీలలో ఇంటింటికీ తాగునీటి కుళాయిలు ఏర్పాటు చేయలేదని, వీధుల్లో అక్కడక్కడా ఏర్పాటు చేశారని స్థానికులు చెబుతున్నారు. కొన్నిచోట్ల మురుగు కాలువలపై పైపు లైన్లు ఉన్నాయి.. మరికొన్నిచోట్ల లీకవుతున్నాయి. దీంతో తాగునీటిని వడకట్టుకుంటున్నారు. లీకేజీలను అరికట్టాలని, ఇంటింటికీ కొళాయిలు ఏర్పాటు చేసి తాగునీటిని అందించాలని వారంతా కోరుతున్నారు.

 ఈనాడు, ఏలూరు 

నాగేశ్వరపురం చెరువు పక్కన కుళాయి నుంచి లీకవుతున్న తాగునీరు