ఓటమి భయంతోనే షర్మిల యాత్రకు అడ్డంకులు

మారుతీనగర్‌, న్యూస్‌టుడే:  సీఎం వైఎస్‌ జగన్‌మోహన్‌రెడ్డికి ఓటమి భయం పట్టుకుందని, అందుకే పీసీసీ అధ్యక్షురాలు, కడప పార్లమెంటు కాంగ్రెస్‌ అభ్యర్థి వైయస్‌ షర్మిల జిల్లాలో చేపట్టిన న్యాయయాత్రను అడ్డుకోవాలని చూస్తున్నారని సీపీఐ జిల్లా కార్యదర్శి గాలిచంద్ర ఆరోపించారు. స్థానిక జిల్లా కార్యాలయంలో శుక్రవారం ఆయన మాట్లాడుతూ జగన్‌ తన ఐదేళ్ల పాలనలో కేంద్రం నుంచి రాష్ట్రానికి నిధులు, అవకాశాలు రాబట్టడంలో ఘోరంగా విఫలమయ్యారని, కనీసం సొంత జిల్లాను కూడా అభివృద్ధి చేయలేకపోయారని విమర్శించారు. కనీసం కరవు మండలాలుగా ప్రకటించలేక పోయారని ఎద్దేవా చేశారు. దివంగత ముఖ్యమంత్రి వైయస్‌ రాజశేఖర్‌రెడ్డి చేపట్టిన అభివృద్ధి పనులు ఏ ఒక్కటీ పూర్తి చేయలేదని ధ్వజమెత్తారు. జగన్‌ వైఫల్యాన్ని, వివేకానందరెడ్డి హత్య కేసు వివరాలను షర్మిల ప్రజలకు వివరించడంతో జగన్‌లో ఓటమి భయం మొదలైందన్నారు. అందుకే వేంపల్లె, లింగాలలో అల్లరిమూకలతో యాత్రను అడ్డుకోవాలని చూశారని ఆగ్రహం వ్యక్తం చేశారు. ఎస్పీ, కలెక్టర్‌ జోక్యం చేసుకుని నిందితులపై చర్యలు తీసుకోవాలని, లేకుంటే ఎన్నికల సంఘం దృష్టికి తీసుకెళతామని హెచ్చరించారు.  సమావేశంలో సీపీఐ నాయకులు పాల్గొన్నారు.