దొంగ ఓట్ల లెక్క తేల్చండి

కలెక్టర్‌ గిరీషకు తెదేపా జిల్లా అధ్యక్షుడు చమర్తి వినతిపత్రం

 కలెక్టర్‌ గిరీషకు ఓటర్ల జాబితాలోని బోగస్‌, డబుల్‌ఎంట్రీ, మృతి చెందిన వారి వివరాలు అందజేస్తున్న తెదేపా జిల్లా అధ్యక్షుడు చమర్తి జగన్‌మోహన్‌రాజు, నాయకులు

రాయచోటి, న్యూస్‌టుడే: ముసాయిదా ఓటర్ల జాబితాలో చోటు చేసుకున్న అక్రమాలపై విచారించి దొంగ ఓట్లను తొలగించాలని కలెక్టర్‌ గిరీషకు బుధవారం తెదేపా జిల్లా అధ్యక్షుడు చమర్తి జగన్‌మోహన్‌రాజు నాయకులతో కలిసి వినతిపత్రం అందజేశారు. ఈ మేరకు బోగస్‌, మృతిచెందిన, ఇతర ప్రాంతాల్లో నివాసముంటున్నవారి వివరాలు అందజేశారు. జిల్లాలో జీరో డోరు నంబరుపై 2 వేలకుపైగా ఓట్లు ఉన్నాయని, సుమారు 11 వేల మృతుల ఓట్లు జాబితా నుంచి తొలగించలేదని, 5 వేలకుపైగా డబుల్‌ ఎంట్రీ ఓట్లు, 15 వేలకుపైగా దొంగ ఓట్లు నమోదైనట్లు కలెక్టర్‌కు ఫిర్యాదు చేశారు. దీనిపై కలెక్టర్‌ స్పందిస్తూ వెంటనే విచారించి తొలగించేందుకు చర్యలు తీసుకుంటామని పేర్కొన్నారు. మృతుల ఓట్లు వివరాలు తెలిపినా బీఎల్వోలు మరణ ధ్రువపత్రాలు ఇవ్వాలని అడుగుతున్నారని, అవి తాము ఎలా ఇవ్వగలమని కలెక్టర్‌ దృష్టికి తీసుకొచ్చారు. దీనిపై కలెక్టర్‌ మాట్లాడుతూ ఓటర్ల వివరాలు ఇస్తే విచారించి స్వచ్ఛమైన జాబితా రూపకల్పనకు చర్యలు తీసుకుంటామని హామీ ఇచ్చారు. వినతిపత్రం అందజేసినవారిలో మదనపల్లె, పీలేరు, రాజంపేట, రాయచోటి నియోజకవర్గాల నాయకులు తదితరులున్నారు.