ఎంపీడీవో కార్యాలయానికి తాళం వేసిన సర్పంచులు

ఒంటిమిట్ట: ఒంటిమిట్ట మండల పరిషత్‌ సర్వసభ్య సమావేశంలో తమను అగౌరవ పరిచారని సర్పంచులు ఎంపీడీవో కార్యాలయానికి తాళం వేసి నిరసన తెలిపారు. సర్వసభ్య సమావేశంలో సమస్యలను ప్రస్తావించిన దవంతరంపల్లి సర్పంచి లక్ష్మీనారయణ పట్ల మండల ఉపాధ్యక్షుడు జనార్ధన్‌ రెడ్డి, ఇన్‌ఛార్జి ఎంపీడీవో సోమశేఖర్‌ అనుచితంగా ప్రవర్తించి.. సమావేశం నుంచి వెళ్లిపోమని చెప్పడంతో సర్పంచులు బయటకు వచ్చారు. సమావేశం ముగిసిన తర్వాత దవంతరంపల్లి, కొండమాచుపల్లి, సాలాబాదు సర్పంచులు లక్ష్మీ నారాయణ రెడ్డి, శివ నారాయణ, స్వర్ణలత ప్రధాన ద్వారం ముంగిట కూర్చొని నిరసన తెలిపారు. ఇన్‌ఛార్జి ఎంపిడీవోతో వాగ్వావాదానికి దిగారు. ఎంపీపీ లక్ష్మీదేవి స్థానంలో మండల ఉపాధ్యక్షుడిని ఎలా బాధ్యతలు అప్పజెప్తారని నిలదీశారు.