పనిచేయడమే నేరం... న్యాయమనడమే పాపం!

15 రోజులకే పెద్దమండ్యం ఎస్‌.ఐ. బదిలీ
నాలుగు నెలలకే వీఆర్‌కు కడప సీఐ తబ్రేజ్‌

ఈనాడు, కడప : సక్రమంగా విధులు నిర్వహించడమే అన్నమయ్య జిల్లా పెద్ద  మండ్యం ఎస్‌.ఐ.వెంకటేష్‌ నేరమైంది... కడప రెండో పట్టణ సీఐ తబ్రేజ్‌ న్యాయంగా విధులు నిర్వహిస్తానంటూ చాటుకునే ప్రయత్నం చేయడంతో బదిలీ వేటు పడింది. సుమారు 15 రోజుల కిందట పెద్దమండ్యం ఎస్‌.ఐ.గా బాధ్యతలు చేపట¨్టన వెంకటేష్‌ను అకస్మాత్తుగా మదనపల్లె తాలూకాకు బదిలీ చేశారు. ఎస్‌.ఐ.గా బాధ్యతలు చేపట¨్టన 15 రోజుల వ్యవధిలోనే 10 కేసులు నమోదు చేసి నేరస్థులపై కఠినంగా వ్యవహరించారు. వైకాపా నాయకుల మాట వినడం లేదని, ఎన్నికల్లో తమ కార్యకలాపాలు సాగవనే ఆందోళన ఆ పార్టీ నేతల్లో మొదలైంది. దీంతో వెంటనే బదిలీ చేసేశారు. ఆయన స్థానంలో ఉమ్మడి కడప జిల్లాలో విధులు నిర్వహిస్తున్న చెన్నకేశవులును నియమించారు. కడప నగరంలోని రెండో పట్టణ పోలీస్‌స్టేషన్‌ వద్ద తెదేపా, వైకాపా నేతల మధ్య ఇటీవల వివాదం జరిగింది. రెండు పార్టీల నేతలు ఘర్షణకు దిగారు. ఈ వ్యవహారంలో రెండు వర్గాలపై కేసులు నమోదు చేయాలనే నిర్ణయం తీసుకున్న సీఐ తబ్రేజ్‌పై బదిలీ వేటు వేశారు. రెండో పట్టణ సీఐగా బాధ్యతలు చేపట్టి సరిగ్గా నాలుగు నెలలు సైతం దాటకముందే వైకాపా నేతల ఒత్తిడితో వీఆర్‌కు బదిలీ చేశారు. ఈయన స్థానంలో ప్రొద్దుటూరు సీఐ ఇబ్రహీంను నియమించారు. సాధారణ ఎన్నికలు సమీపిస్తున్న తరుణంలో వైకాపా నేతలు ఇష్టారాజ్యంగా పోలీసు అధికారులను నియమించుకుంటున్నారు.