పీఎస్‌ఎల్‌వీ రిహార్సల్‌ పూర్తి

నేడు రాకెట్‌ సన్నద్ధత సమావేశం

స్పెడెక్స్‌ ఉపగ్రహాలు

సూళ్లూరుపేట, న్యూస్‌టుడే: సతీశ్‌ ధవన్‌ స్పేస్‌ సెంటర్‌ (షార్‌)లోని మొదటి ప్రయోగ వేదిక నుంచి నింగిలోకి ఎగిరేందుకు పీఎస్‌ఎల్‌వీ-సీ60 సిద్ధంగా ఉంది. వాహకనౌక అనుసంధానం పూర్తయిన పిదప, వివిధ పరీక్షలు నిర్వహించారు. శుక్రవారం రిహార్సల్‌తోపాటు గ్లోబుల్, గ్రౌండ్‌ తనిఖీలు చేపట్టారు. వాహకనౌకలోని అన్ని దశలు పనిచేస్తున్నట్లు శాస్త్రవేత్తలు గుర్తించారు. రాకెట్‌ సన్నద్ధత(ఎంఆర్‌ఆర్‌), లాంచ్‌ ఆథరైజేషన్‌ సమావేశాలు శనివారం జరగనున్నాయి. పీఎస్‌ఎల్‌వీ ప్రయోగానికి 25 గంటలపాటు కౌంట్‌డౌన్‌ నిర్వహించేలా శాస్త్రవేత్తలు నిర్ణయించారు. దీంతో ఆదివారం రాత్రి 8.58 గంటలకు కౌంట్‌డౌన్‌ ప్రారంభం కానుంది. ఇది నిరంతరాయంగా కొనసాగిన పిదప సోమవారం రాత్రి 9.58 గంటలకు పీఎస్‌ఎల్‌వీ-సీ60 కక్ష్యలోకి దూసుకెళ్లనుంది. ఇస్రో అధిపతి డాక్టర్‌ సోమనాథ్‌ ఆదివారం షార్‌కు రానున్నారు.