Hyderabad: జూబ్లీహిల్స్‌లో దోపిడీకి యత్నం.. తాళ్లతో కట్టేసి డ్రైవర్‌పై కత్తులతో దాడి

హైదరాబాద్‌: జూబ్లీహిల్స్‌లో అర్ధరాత్రి ఓ ఇంట్లోకి చొరబడిన దుండగులు కత్తులతో దాడి చేసి.. దోపిడీకి యత్నించారు. కుటుంబ సభ్యులు ఇచ్చిన సమాచారంతో జూబ్లీహిల్స్ పోలీసులు సకాలంలో చేరుకోవడంతో అందరూ సురక్షితంగా బయటపడ్డారు. జూబ్లీహిల్స్‌లో నివసించే అజయ్ అగర్వాల్ ఇంట్లో చాలాకాలంగా రాధాచంద్(40) కాపలాదారుగా పనిచేస్తున్నాడు. యజమాని ఇంట్లోనే దోపిడీ చేయాలని మరో ఐదుగురితో కలిసి పథకం పన్నాడు.

అర్ధరాత్రి రాధాసింగ్ మిగితా వారితో కలిసి కత్తులు, తాళ్లతో అజయ్ అగర్వాల్ ఇంటికి చేరుకున్నాడు. ముందుగా ఇంటి ఆవరణలోని గదిలో ఉన్న డ్రైవర్ దయాచంద్‌ను తాళ్లతో బంధించే క్రమంలో అతడు ప్రతిఘటించాడు. దీంతో అతనిపై కత్తితో దాడిచేసి తీవ్రంగా గాయపరిచారు. అనంతరం తాళ్లతో కట్టేసి నేరుగా అజయ్ అగర్వాల్ ఇంట్లోకి వెళ్లేందుకు ప్రయత్నించారు. ఇంట్లోని కుటుంబ సభ్యులంతా భయంతో వణికిపోయారు. జూబ్లీహిల్స్ ఠాణాకు సమాచారం ఇవ్వగా వెంటనే అక్కడికి పోలీసులు చేరుకున్నారు. దోపిడీకి యత్నిస్తున్న రాధాచంద్‌తో పాటు మరో ఐదుగురిని అదుపులోకి తీసుకున్నారు. గాయపడిన డ్రైవర్‌ను వెంటనే ఆసుపత్రికి తరలించారు. ఈ మేరకు జూబ్లీహిల్స్ పోలీసులు కేసు నమోదు చేశారు.