Tamil Nadu: హుండీలో పడిన ఐఫోన్‌.. వేలంలో రూ.10వేలకు దక్కించుకున్న సొంతదారుడు

 సెల్‌ఫోన్‌ యజమాని, ఆలయ అధికారిణి

మహాబలిపురం: చెంగల్పట్టు జిల్లా తిరుప్పోరూర్‌లోని కందసామి మురుగన్‌ ఆలయానికి గతేడాది ఆగస్టులో చెన్నై అంబత్తూర్‌కు చెందిన దినేష్‌ అనే వ్యక్తి కుటుంబంతో కలిసి స్వామి దర్శనానికి వచ్చారు. మానసిక ఒత్తిడితో ఉన్న ఆయన తన ఐఫోన్‌ 13 ప్రోను హుండీలో వేసిన సంగతి తెలిసిందే. తిరిగివ్వాలని అధికారులను కోరగా చెన్నై నుంగంబాక్కంలోని దేవాదాయ శాఖ కార్యాలయంలో విన్నవించాలని తెలిపారు. గతనెల ఆలయ హుండీల లెక్కింపు సమయంలో ఐఫోన్‌ బయటకు తీశారు.  అది స్వామివారికే సొంతమని అందులోని డేటా మాత్రం తీసుకోవచ్చని తెలపడంతో నిరాశకు లోనయ్యాడు. ఎట్టకేలకు దేవాదాయ శాఖ నిబంధనల మేరకు వేలం వేయగా దినేష్‌ రూ.10 వేలకు పాడటంతో బుధవారం ఆలయ ప్రాంగణంలో అధికారులు ఐఫోన్‌ అప్పగించారు.