Arvind Kejriwal: కేజ్రీవాల్‌కు మరో శీష్‌ మహల్‌: ఫొటో షేర్ చేసిన భాజపా

ఇంటర్నెట్‌డెస్క్‌: దిల్లీ అసెంబ్లీ ఎన్నికల వేళ వినిపించిన ‘శీష్‌ మహల్’ పదం మరోసారి వార్తల్లోకి వచ్చింది. దిల్లీ మాజీ ముఖ్యమంత్రి అరవింద్‌ కేజ్రీవాల్‌ (Arvind Kejriwal)కు చండీగఢ్‌లో లగ్జరీ భవనం కేటాయించినట్లు తాజాగా భాజపా ఆరోపణలు చేసింది. ఆ భవనం ఫొటో షేర్ చేసి విమర్శలు చేసింది.

‘‘కామన్ మ్యాన్‌గా ప్రచారం చేసుకున్న వ్యక్తికి సంబంధించి మరో శీష్‌ మహల్ ఇది. దిల్లీలోని మహల్‌ నుంచి ఖాళీ చేసిన తర్వాత.. పంజాబ్ సూపర్ సీఎంగా చలామణి అవుతోన్న అరవింద్ కేజ్రీవాల్ కోసం మరో విలాస భవనాన్ని నిర్మించారు. చండీగఢ్‌ సెక్టార్‌2లో రెండు ఎకరాల విస్తీర్ణంలో ఉన్న 7 స్టార్ భవనం కేజ్రీవాల్‌కు కేటాయించారు’’ అని భవనం చిత్రాన్ని భాజపా షేర్ చేసింది. ఈ ఫొటోను ముందుగా ఆమ్‌ ఆద్మీ పార్టీ రాజ్యసభ ఎంపీ స్వాతీ మాలీవాల్ నెట్టింట్లో పంచుకున్నారు. ఆమె కొంతకాలంగా సొంతపార్టీపై విమర్శలు చేస్తోన్న సంగతి తెలిసిందే.

• ‘లంచం.. లంచం.. లంచం!’.. వైరల్‌ అయిన విశ్రాంత అధికారి పోస్ట్‌

ఇదిలా ఉంటే.. దిల్లీలోని 6 ఫ్లాగ్‌ స్టాఫ్‌ రోడ్‌లో ఉన్న ప్రభుత్వ బంగ్లాను అరవింద్‌ కేజ్రీవాల్‌ (Arvind Kejriwal) సీఎంగా ఉన్న సమయంలో అధికారిక నివాసంగా వినియోగించారు. ఈ బంగ్లాను ‘శీష్‌ మహల్‌ (అద్దాల మేడ)’గా భాజపా పేర్కొంది. రూ.45 కోట్ల ప్రజాధనాన్ని దుర్వినియోగం చేసి ఆయన 7- స్టార్‌ రిసార్ట్‌గా మార్చుకున్నారని విమర్శించింది. దిల్లీ అసెంబ్లీ ఎన్నికల సమయంలోనూ ఆప్‌ మోసాలకు ఆ మహల్‌ ఓ ఉదాహరణ అంటూ ప్రజల్లోకి బలంగా తీసుకెళ్లింది. నాలుగు కోట్ల మందికి ఇళ్లు కట్టించామని, కానీ.. తానేమీ అద్దాల మేడ (Sheesh mahal) కట్టుకోలేదని ప్రధాని మోదీ కూడా దుయ్యబట్టిన సంగతి తెలిసిందే. ఆప్ ప్రభుత్వంపై వచ్చిన ఈ అవినీతి ఆరోపణలు అసెంబ్లీ ఎన్నికల్లో ఆ పార్టీని దెబ్బతీశాయి. భాజపాకు విజయాన్ని కట్టబెట్టాయి.