CM Siddaramaiah: పిల్లల్లో సృజనాత్మకతను దెబ్బతీస్తున్న హిందీ, ఆంగ్ల భాషలు

 కర్ణాటక సీఎం సిద్ధరామయ్య

ఈనాడు, బెంగళూరు: హిందీ, ఆంగ్ల భాషల ప్రభావంతో బాలల్లో సృజనాత్మకత దెబ్బతింటోందని కర్ణాటక ముఖ్యమంత్రి సిద్ధరామయ్య ఆందోళన వ్యక్తం చేశారు. ఆ రాష్ట్ర ఆవిర్భావ దినోత్సవం సందర్భంగా ఆయన శనివారం బెంగళూరులో నిర్వహించిన ఓ కార్యక్రమంలో మాట్లాడుతూ.. ‘‘మాతృభాష నిర్లక్ష్యంతో బాలల్లో ఆలోచన, సృజనాత్మకత తగ్గుతోంది. అభివృద్ధి చెందిన దేశాల్లో పిల్లలు మాతృభాషలోనే చదువులు, అధ్యయనాలు చేపడుతున్నారు. దురదృష్టవశాత్తు భారత్‌లో మాతృభాషను పరిరక్షించే చట్టాలు లేవు. దీంతో ఆంగ్లం, హిందీ భాషల ప్రభావం విద్యార్థులపై ఎక్కువగా ఉండటంతో వారి ప్రతిభ సన్నగిల్లుతోంది. హిందీ, సంస్కృత భాషలపై కేంద్రం ఆసక్తి చూపుతున్నా, ఆయా రాష్ట్రాల మాతృభాషలను నిర్లక్ష్యం చేస్తోంది. కన్నడ భాషకు శాస్త్రీయ హోదా ఉన్నా అందుకు తగిన నిధులను అందించడం లేదు. కేంద్రం  ఇకనైనా మాతృభాషల్లోనే విద్య తప్పనిసరి చేసే చట్టాలను తీసుకురావాలి’’ అని ఆయన డిమాండ్‌ చేశారు. కర్ణాటక రాష్ట్రం ఆవిర్భవించి 69 ఏళ్లు పూర్తైన సందర్భంగా.. కన్నడ భాష పరిరక్షణకు యువత ముందుకు రావాలని సీఎం పిలుపునిచ్చారు.