వైద్య విద్యార్థుల స్టైపెండ్‌ చెల్లింపులో వైఫల్యం

ఎన్‌ఎంసీపై సుప్రీంకోర్టు ఆగ్రహం

దిల్లీ: ఇంటర్న్‌షిప్‌ చేస్తున్న వైద్య విద్యార్థులకు స్టైపెండ్‌ చెల్లింపులో విఫలమవుతున్న జాతీయ వైద్య కమిషన్‌పై (ఎన్‌ఎంసీ) సుప్రీం కోర్టు తీవ్ర ఆగ్రహం వ్యక్తం చేసింది. యువ డాక్టర్లుగా సేవలందించే ఈ విద్యార్థులు పని గంటల్ని పట్టించుకోకుండా దాదాపు 18 గంటలపాటు విశేష సేవలందిస్తారని, వారికి స్టైపెండ్‌ చెల్లించక పోవడం దారుణమని జస్టిస్‌ అరవింద్‌ కుమార్, జస్టిస్‌ అంజారియాలతో కూడిన ధర్మాసనం మంగళవారం వ్యాఖ్యానించింది. ఈ విషయం దీర్ఘకాలంగా కోర్టులో పెండింగులో ఉన్నా ఎన్‌ఎంసీ మీనమేషాలు లెక్కించడం ఆందోళనకరమని అభిప్రాయపడింది. పలు వైద్య కళాశాలలు ఇంటర్న్‌షిప్‌ స్టైపెండ్‌ చెల్లించకపోవడాన్ని సవాలు చేస్తూ వైద్య విద్యార్థులు ఈ పిటిషన్‌ దాఖలు చేశారు.