Tejashwi Yadav: ఫిష్‌ కామెంట్లకు ఆరెంజ్‌తో చెక్‌..: విమర్శలకు దీటుగా తేజస్వీయాదవ్‌ కౌంటర్

పట్నా: ఆర్జేడీ నాయకుడు తేజస్వీ యాదవ్‌ (Tejashwi Yadav) ప్రయాణిస్తున్న సమయంలో భోజనంగా చేపను తింటున్నప్పుడు చిత్రీకరించిన వీడియోపై విమర్శలు వ్యక్తమయ్యాయి. వాటికి కౌంటర్ తాజాగా ఆయన షేర్ చేసిన వీడియో ఆకట్టుకుంటోంది. ‘‘మేము హెలికాప్టర్‌లో ఆరెంజ్‌ పార్టీ చేసుకున్నాం. నారింజ రంగుతో వారికి చిరాకురాదులే. అంతేకదా..?’’ అని వ్యంగ్యంగా వ్యాఖ్యానించారు. మరో నేత ముకేశ్‌ సాహ్నీతో కలిసి ఆరెంజ్‌ను ఆస్వాదిస్తూ కనిపించారు. ఎన్నికల ప్రచారంలో పాల్గొన్న వారు తమపై విమర్శకులకు ఈ విధంగా బదులిచ్చారు.

చేప తింటూ తీసుకున్న వీడియోపై పలువురు భాజపా నాయకులు, నెటిజన్లు కామెంట్లు పెట్టారు.  తేజస్వీ యాదవ్‌ ‘సీజనల్‌ సనాతనవాది’, ఆయన బుజ్జగింపు రాజకీయాలు చేస్తున్నారని కేంద్ర మంత్రి గిరిరాజ్‌ సింగ్‌ వ్యాఖ్యలు చేశారు. వీటిపై తేజస్వి స్పందిస్తూ.. అది పాత వీడియో అని తెలిపారు. తన పేరు చెడగొట్టేందుకు ప్రయత్నించేవారి తెలివితక్కువతనాన్ని బహిర్గతం చేయడంలో విజయం సాధించానని పేర్కొన్నారు.