Chinna Movie Review: రివ్యూ: చిన్నా.. సిద్ధార్థ్‌ కీలక పాత్రలో నటించిన ఎమోషనల్‌ డ్రామా మెప్పించిందా?

Chinna Movie Review | చిత్రం: చిన్నా; నటీనటులు: సిద్ధార్థ్‌ నిమిషా సజయన్‌, సహస్ర శ్రీ, అంజలి నాయర్‌ తదితరులు; సంగీతం: దిబు నైనన్‌ థామస్‌, విశాల్‌ చంద్రశేఖర్‌(నేపథ్య సంగీతం); ఎడిటింగ్‌: సురేష్‌ ఏ ప్రసాద్‌; సినిమాటోగ్రఫీ: బాలాజీ సుబ్రహ్మణ్యం; నిర్మాత: సిద్ధార్థ్‌; రచన, దర్శకత్వం: ఎస్‌.యు.అరుణ్‌కుమార్‌; విడుదల: 06-10-2023

‘ఈ సినిమా న‌చ్చ‌లేదంటే ఇకపై నేను ఇక్క‌డికి రాను, నా సినిమాల్ని తెలుగులో విడుద‌ల చేయ‌ను’ అంటూ క‌థానాయ‌కుడు  సిద్ధార్థ్ ఇటీవ‌ల ‘చిన్నా’ వేడుక‌లో చెప్ప‌డం ప‌రిశ్ర‌మ‌లోనూ... ప్రేక్ష‌కుల్లోనూ చ‌ర్చని లేవనెత్తింది. ఒక‌ప్పుడు వ‌రుస విజ‌యాల‌తో స‌త్తా చాటిన సిద్ధార్థ్... కొన్నాళ్లుగా స‌రైన విజ‌యాల్ని అందుకోలేక‌పోతున్నాడు. ఆయ‌న ఏ భాష‌లో సినిమా చేసినా దాన్ని తెలుగులో విడుద‌ల చేస్తూ వస్తున్నారు. కానీ, గ‌త చిత్రాల స్థాయిలో ఆద‌ర‌ణ పొంద‌లేక‌పోతున్నాయి. ఈసారి ఆయ‌న త‌మిళంలో చేసిన ‘చిత్తా’ని తెలుగులో ‘చిన్నా’ పేరుతో విడుద‌ల చేశాడు. ఈ సినిమా వేడుక‌లో మాట్లాడుతూ సిద్ధార్థ్ సినిమాలు ఎవ‌రు చూస్తార‌ని కొంత‌మంది అన్నారంటూ భావోద్వేగానికి గుర‌య్యారు. ఆ మాట‌లు సామాజిక మాధ్య‌మాల్లో వైర‌ల్ అయ్యాయి. (Chinna Movie Review in telugu) సిద్ధార్థ్ న‌టిస్తూ స్వ‌యంగా నిర్మించిన ‘చిత్తా’ త‌మిళంలో విమ‌ర్శ‌కుల మెప్పు పొందింది.  మంచి సినిమా తీశాన‌ని... తెలుగు ప్రేక్ష‌కుల్నీ మెప్పిస్తుందంటూ న‌మ్మ‌కంగా చెప్పారు సిద్ధార్థ్‌ . మ‌రి సినిమా ఎలా కథేంటి? ఎలా ఉంది?

క‌థేంటంటే: ఈశ్వ‌ర్ అలియాస్ చిన్నా (సిద్ధార్థ్‌) మున్సిపాలిటీలో ప‌నిచేసే ఓ చిరుద్యోగి. త‌న అన్న‌య్య చ‌నిపోవ‌డంతో వ‌దిన, అన్న కూతురు సుంద‌రి అలియాస్‌ చిట్టి  (స‌హ‌స్ర శ్రీ) బాధ్య‌త‌ల్ని త‌న భుజాన మోస్తూ జీవితం కొన‌సాగిస్తుంటాడు. అంతా సాఫీగా సాగిపోతున్న ద‌శ‌లో  చిట్టి స్నేహితురాలైన మున్ని (స‌బియా త‌స్నీమ్‌)  లైంగిక దాడికి గుర‌వుతుంది. మున్నిపై లైంగిక దాడి చేసింది చిన్నానే అని ఆరోప‌ణ‌లు వ‌స్తాయి. సాక్ష్యంగా ఓ వీడియో కూడా బ‌య‌టికొస్తుంది. న‌మ్మ‌శ‌క్యం కాని ఆ సంఘ‌ట‌న త‌ర్వాత ఏం జ‌రిగింది?ఆ లైంగిక దాడికి పాల్ప‌డింది చిన్నానేనా?ఇరు కుటుంబాలు ఈ షాక్ నుంచి తేరుకోక‌ముందే చిన్నా అన్న కూతురు చిట్టి కూడా క‌నిపించ‌కుండా పోతుంది. చిట్టి మాయం వెన‌క ఎవ‌రున్నారు?  త‌దిత‌ర విష‌యాలు తెలియాలంటే సినిమా చూడాల్సిందే.

ఎలా ఉందంటే: ఒక సున్నిత‌మైన అంశానికి థ్రిల్లింగ్ నేప‌థ్యాన్ని జోడించి రూపొందించిన చిత్ర‌మిది. చిన్నారులపై లైంగిక దాడుల్లోని ఓ కోణాన్ని ఆవిష్క‌రిస్తూ అంద‌రిలోనూ ఆలోచ‌న రేకెత్తిస్తుంది.  చిన్నారుల సంర‌క్ష‌ణ విష‌యంలో మ‌నం ఏమేం నేర్చుకోవాలో... వాళ్లకి సుర‌క్షితమైన స‌మాజాన్ని సృష్టించ‌డం ఎంత అత్య‌వ‌స‌ర‌మో ఈ సినిమా చెప్ప‌క‌నే చెబుతుంది. మ‌న ఇంటిదాకా వ‌స్తే త‌ప్ప కొన్ని విష‌యాలపై స్పందించం. కానీ, ఇలాంటి సంఘ‌ట‌న మ‌న ఇంట్లోనే జ‌రిగిందా.. జ‌రిగే అవ‌కాశం ఉంది క‌దా! అనే భావ‌న‌కి గురిచేస్తూ ఆద్యంతం హృద‌యాల్ని బ‌రువెక్కిస్తూ సాగుతుంది. (Chinna Movie Review in telugu) గుడ్ ట‌చ్ బ్యాడ్ ట‌చ్ మొద‌లుకొని పిల్ల‌ల‌ని సెల్‌ఫోన్‌కి దూరంగా ఉంచ‌డం, వారిని ఎప్పుడూ ఓ కంట క‌నిపెడుతూ ఉండ‌టం ఎంత అవ‌స‌ర‌మో ఈ సినిమా చెబుతుంది. ఈశ్వ‌ర్‌, అత‌ని ప్రపంచాన్ని ప‌రిచ‌యం చేస్తూ మెల్ల‌గా క‌థ‌లో ప్రేక్ష‌కుల్ని లీనం చేశాడు ద‌ర్శ‌కుడు. చిట్టి, మున్నీ క‌లిసి ఆటో ఎక్కాక క‌థ‌లో వేగం పుంజుకుంటుంది. ఈశ్వ‌ర్‌పై  లైంగిక దాడి ఆరోప‌ణ రావ‌డం సినిమాలో ఓ పెద్ద మ‌లుపు. ఆ నేప‌థ్యంలో సంఘ‌ర్ష‌ణ కొన‌సాగుతుండ‌గానే చిట్టి మాయం అవుతుంది. అక్క‌డ్నుంచి క‌థ‌లో మ‌రింత థ్రిల్ మొద‌ల‌వుతుంది.

ప్ర‌థ‌మార్ధం స‌న్నివేశాలు, ఆ నేర నేప‌థ్యం ‘గార్గి’, ‘ల‌వ్‌స్టోరి’ త‌ర‌హా సినిమాల్ని గుర్తు చేస్తుంది. ద్వితీయార్ధంలో కేసు ప‌రిశోధ‌న‌, నిందితుడిని వెంటాడే స‌న్నివేశాలు ప్రేక్ష‌కుడికి థ్రిల్‌ని పంచుతాయి. కానీ, చిన్నారుల‌పై జ‌రిగే దాడుల కోణం ఒక‌వైపు మ‌న‌సుల్ని క‌దిలిస్తూనే ఉంటుంది. ఒక‌వైపు ఈ క‌థ‌ని న‌డుపుతూనే మ‌రోవైపు చిన్నారులు, మ‌హిళ‌ల విష‌యంలో జ‌రుగుతున్న హింస‌ని ఎత్తి చూపాడు ద‌ర్శ‌కుడు. (Chinna Movie Review) ‘చిన్నా చేయి వేసినా అమ్మ‌కి చెప్పాలి’ అని చిట్టికి త‌న త‌ల్లి చెబుతున్న‌ప్పుడు సిద్ధార్థ్ ప‌లికించిన హావ‌భావాలు, ద్వితీయార్ధంలో క‌థానాయిక శ‌క్తి పాత్ర త‌న మామ చేతిలో లైంగిక దాడికి గురైన విష‌యం చెప్పిన‌ప్పుడూ, ఇలాంటి సంఘ‌ట‌న‌ల నుంచి బాధితుల్ని బ‌య‌టికి తీసుకు రావ‌డం ఎంత ముఖ్య‌మో అని చెప్పే స‌న్నివేశాలు సినిమాకి కీల‌కం. నిజాయ‌తీగా చేసిన ఓ మంచి ప్ర‌య‌త్నం ఈ చిత్రం. వాణిజ్యాంశాల జోలికి వెళ్ల‌కుండా క‌థ‌నే న‌మ్మి కొన్ని జీవితాల్ని, కొన్ని సంఘ‌ట‌న‌ల్ని స‌జీవంగా తెర‌పై ఆవిష్క‌రించారు.

ఎవ‌రెలా చేశారంటే: సిద్ధార్థ్  త‌న న‌ట‌న‌తో ఈశ్వ‌ర్ పాత్ర‌కి ప్రాణం పోశాడు. ల‌వ‌ర్‌బాయ్ త‌ర‌హా పాత్ర‌లు చేసి మెప్పించిన ఆయ‌న ఇందులో పూర్తి భిన్నంగా, ఓ స‌హ‌జ‌మైన పాత్ర‌లో క‌నిపించారు. ఆయ‌న పాత్ర నేప‌థ్యంలో పండిన  భావోద్వేగాలు సినిమాకి కీల‌కం. ఈశ్వ‌ర్ వ‌దిన పాత్ర‌లో అంజ‌లి నాయ‌ర్ క‌నిపిస్తారు. చిన్నారులు స‌బియా, స‌హస్ర శ్రీ  న‌ట‌న మెప్పిస్తుంది. ముఖ్యంగా ద్వితీయార్ధంలో స‌హస్ర న‌ట‌న చాలా బాగుంటుంది. (Chinna Movie Review in telugu) క‌థానాయిక నిమిషా స‌జ‌యన్ పాత్ర కూడా అత్యంత స‌హ‌జంగా తెర‌పై క‌నిపిస్తుంది. పారిశుధ్య కార్మికురాలిగా  క‌నిపించే ఆమె, ద్వితీయార్ధంలో త‌న న‌ట‌న‌తో క‌ట్టిప‌డేశారు. ఇత‌ర న‌టులు పాత్ర‌ల ప‌రిధి మేర‌కు న‌టించారు.  సాంకేతికంగా సినిమా ఉన్న‌తంగా ఉంది.  విశాల్ చంద్ర‌శేఖ‌ర్ నేప‌థ్య సంగీతం మ‌రింత ప్ర‌భావం చూపిస్తుంది.  కెమెరా, ఎడిటింగ్ విభాగాలు చ‌క్క‌టి ప‌నితీరుని క‌న‌బ‌రిచాయి.  ద‌ర్శ‌కుడు క‌థ‌, క‌థ‌నాల్ని అత్యంత స‌హ‌జంగా న‌డిపించిన తీరు సినిమాకి ప్ర‌ధాన ఆక‌ర్ష‌ణ‌. మ‌న‌సుల్ని కొంత‌కాలంపాటు వెంటాడే అంశాన్ని తెర‌పై స్పృశించారు.  నిర్మాణం ఉన్న‌తంగా ఉంది.

• బ‌లాలు
• + క‌థ‌, క‌థ‌నం
• + సిద్ధార్థ్ న‌ట‌న 
• + సంగీతం
• బ‌ల‌హీన‌త‌లు
• - ద్వితీయార్ధంలో కొన్ని స‌న్నివేశాలు
• చివ‌రిగా: చిన్నా.. ఆలోచ‌న రేకెత్తిస్తాడు.. అలరిస్తాడు!
• గమనిక: ఈ సమీక్ష సమీక్షకుడి దృష్టి కోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే!