Chiranjeevi: డీప్‌ ఫేక్‌, సైబర్‌ నేరాలకు ఎవరూ భయపడొద్దు: చిరంజీవి

ఇంటర్నెట్‌ డెస్క్:  టెక్నాలజీని మంచి కోసం వాడుకోవాలని చిరంజీవి అన్నారు. తెలంగాణ పోలీస్‌ ఆధ్వర్యంలో జరిగిన ఏక్తా దివస్‌ కార్యక్రమానికి చిరంజీవి హాజరయ్యారు. దేశాన్ని ఏకం చేసి మనకందించిన సర్దార్ వల్లభ్‌భాయ్ పటేల్ లాంటి గొప్ప వ్యక్తుల జీవితాన్ని ఆదర్శంగా తీసుకోవాలని పిలుపునిచ్చారు. తెలంగాణలో పోలీస్‌ వ్యవస్థ చాలా బలంగా ఉందని కొనియాడారు. ప్రజలకు పోలీసులు అండగా ఉన్నారని అందరూ ధైర్యంగా ఉండాలని ఈ సందర్భంగా చిరంజీవి (Chiranjeevi) తెలిపారు. అలాగే ప్రజలకు, సెలబ్రిటీలకు తలనొప్పిగా మారిన డీప్‌ ఫేక్‌, సైబర్‌ నేరాలపై చిరంజీవి స్పందించారు.

• ఆ అంకితభావమే పవన్‌ను స్టార్‌ని చేసింది: ఇమ్రాన్‌ హష్మీ

‘‘డీప్‌ ఫేక్‌ అంశాన్ని ఇప్పటికే పోలీసుల దృష్టికి తీసుకెళ్లాను. డీజీపీ, సీపీ సజ్జనార్‌ ఈ విషయాన్ని సీరియస్‌గా తీసుకున్నారు. ఎవరూ డీప్‌ ఫేక్‌, సైబర్‌ నేరాలకు భయపడాల్సిన అవసరం లేదు. దీనిపై ఒక చట్టం తీసుకొచ్చేలా ప్రయత్నం చేస్తున్నారు. కచ్చితంగా అది జరగాలని కోరుకుంటున్నా. వీటి నుంచి సామాన్యులకు కూడా రక్షణ కలిగిస్తారు. పోలీసులు చాలా ఫ్రెండ్లీగా ఉంటున్నారు. సామాన్యులు కూడా ఈ విషయంలో భయపడాల్సిన అవసరం లేదు’’ అని చిరంజీవి అన్నారు. టెక్నాలజీని మంచికి ఉపయోగించుకోవాలని ఆయన తెలిపారు. 

ఇక రాష్ట్రంలో శాంతిభద్రతల కోసం పోలీసులు కృషి చేస్తున్నారని డీజీపీ శివధర్ రెడ్డి తెలిపారు. నగర ప్రజలకు సేవ చేసేందుకు హైదరాబాద్ పోలీసులు ఎల్లవేళలా సిద్ధంగా ఉన్నారని సీపీ సజ్జనార్ స్పష్టం చేశారు. అందరం కలిసిమెలిసి ఏక్తా దివస్‌ స్ఫూర్తిని చాటాలని సీపీ పిలుపునిచ్చారు.