బేబీ డాక్టర్‌ని కాస్తా యాక్టర్‌నయ్యా!

‘ప్రేమలు’తో కుర్రకారుని అలరించిన మలయాళీ భామ మమితా బైజు.. ప్రస్తుతం వరుస అవకాశాలతో జోరుమీదుంది. ఇటీవలే ‘డ్యూడ్‌’తో మెప్పించిన ఈమె.. తన తండ్రిలా డాక్టర్‌ కావాలనుకుందట. తాజాగా ఓ ఇంటర్వ్యూలో పాల్గొన్న మమిత తన సినీ కెరీర్‌ గురించి కొన్ని ఆసక్తికర సంగతుల్ని పంచుకుంది. ‘‘మా నాన్న డాక్టర్‌. నేను ఆయన క్లినిక్‌కి వెళితే.. అందరు నన్ను ‘బేబీ డాక్టర్‌’ అని పిలుస్తుంటారు. ఆయన దగ్గరకు సంతోషంగా కృతజ్ఞతలు చెప్పడానికి వచ్చే రోగులను చూసినప్పుడు సంతోషంగా అనిపిస్తుంది. నాకు ఆ వృత్తి పట్ల చాలా గౌరవం ఉంది. నేను కూడా వైద్యురాలు కావాలని ఆశపడ్డాను. కానీ సినిమా నా జీవితంలోకి అనుకోకుండా వచ్చింది. 9వ తరగతిలో ఉన్నప్పుడు నాకు ‘సర్వోపరి బాలక్కారన్‌’ చిత్రంలో నటించే అవకాశం వచ్చింది. ఆ సినిమాను మా నాన్న స్నేహితుడే నిర్మించారు. ఆయనే నన్ను ఆడిషన్స్‌కు వెళ్లమని ఎప్పుడూ చెప్తుండేవారు. ఆ సినిమా తర్వాత ఎన్నో అవకాశాలు వచ్చాయి. నెమ్మదిగా నటనను ఆస్వాదించడం, ఇష్టపడడం ప్రారంభించా. సినిమాతో మంచి బంధం ఏర్పడింద’’ని చెప్పుకొచ్చింది.