ఎదలో పోటెత్తు సంద్రం.. ఎవడికి తలవంచని గుణం

‘కాంత’ చిత్రంతో నవంబరులో థియేటర్లలో సందడి చేయనున్నారు హీరో దుల్కర్‌ సల్మాన్‌. ఆయన.. భాగ్యశ్రీ బోర్సే జంటగా నటించిన ఈ సినిమాని సెల్వమణి సెల్వరాజ్‌ తెరకెక్కించారు. రానా దగ్గుబాటి, దుల్కర్, ప్రశాంత్‌ పొట్లూరి, జోమ్‌ వర్గీస్‌ నిర్మించారు. సముద్రఖని కీలక పాత్ర పోషించారు. ఈ సినిమా నవంబరు 14న ప్రేక్షకుల ముందుకు రానుంది. ఈ నేపథ్యంలోనే ‘రేజ్‌ ఆఫ్‌ కాంత’ పేరుతో ఓ ఆంథమ్‌ను విడుదల చేశారు. ‘‘ఎదలో పోటెత్తు సంద్రం.. ఎవడికి తలవంచని గుణం..’’ అంటూ తెలుగు, తమిళం, ఇంగ్లిష్‌ భాషల మేళవింపుగా సాగే ఈ ర్యాప్‌ గీతానికి ఝాను చాంతర్‌ స్వరాలు సమకూర్చారు. తెలుగు ర్యాప్‌ను అభినవ కవి స్వయంగా రచించి.. ఆలపించారు. ‘‘సినిమా స్వర్ణయుగంగా పేర్కొనే 1950ల నాటి మద్రాస్‌ నేపథ్యంలో సాగే కథతో రూపొందిన చిత్రమిది. దుల్కర్, భాగ్యశ్రీల నటన.. వాళ్ల పాత్రలు ఆశ్చర్యపరిచేలా ఉంటాయి’’ అని చిత్ర వర్గాలు తెలిపాయి. ఈ సినిమాకి కూర్పు: లెవెల్లిన్‌ ఆంథోని గోన్సాల్వేస్, ఛాయాగ్రహణం: డాని శాంచెజ్‌ లోపెజ్‌.