రాజ్‌కుమార్‌తో కీర్తి?

‘మాలిక్‌’ చిత్రంతో ఇటీవల ప్రేక్షకుల ముందుకొచ్చి అలరించాడు బాలీవుడ్‌ నటుడు రాజ్‌కుమార్‌ రావు. తాజాగా ఆయన ఆదిత్య నింబాల్కర్‌ దర్శకత్వంలో ఓ సినిమాలో నటించనున్నట్లు వార్తలొస్తున్నాయి. భారతదేశ విద్యా వ్యవస్థ నేపథ్యంలో తెరకెక్కనున్న ఈ చిత్రంలో రాజ్‌కుమార్‌కి జోడీగా కీర్తి సురేశ్, తాన్య మణిక్తలు నటించనున్నట్లు తెలుస్తోంది. ‘‘ఈ చిత్రంలో నటించనున్న ప్రతి ఒక్కరి పాత్ర కీలకమైనది. ముఖ్యంగా తాన్య పాత్ర డిమాండింగ్‌ వ్యవస్థను నావిగేట్‌ చేస్తున్న అనేకమంది భారతీయుల స్వరాన్ని ప్రతిబింబిస్తుంద’’ని చిత్ర సన్నిహిత వర్గాల సమాచారం. ఈ చిత్రం ప్రస్తుతం విద్యార్థులు, ఉపాధ్యాయులు ఎదుర్కొంటున్న విద్యాపరైన ఒత్తిళ్లు, వ్యవస్థాగత సవాళ్లను అన్వేషించనున్నట్లు తెలుస్తోంది. నవంబరులో ఈ సినిమా చిత్రీకరణ ప్రారంభం కానుంది.