ఇక శాశ్వతంగా ముగింపు పలుకుదాం!

ఓటీటీలో ప్రేక్షకులను మలుపులతో సీటు అంచున కూర్చోబెడుతూ.. ఉత్కంఠ కలిగించే వెబ్‌సిరీస్‌లకు ఉండే ప్రత్యేకతే వేరు. అందులో ముందు వరుసలో ఉంటుంది ‘స్ట్రేంజర్‌ థింగ్స్‌’. ఇప్పటికే నాలుగు భాగాలుగా ప్రేక్షకుల ముందుకు వచ్చి విశేష ప్రేక్షకాదరణను సొంతం చేసుకుందీ సిరీస్‌. ఇప్పుడు ఇందులో ‘స్ట్రేంజర్‌ థింగ్స్‌ 5’ రాబోతున్న సంగతి తెలిసిందే. మిల్లీ బాబీ బ్రౌన్, ఫిన్‌ వోల్ఫ్‌ హార్డ్, సాడీ సింక్‌ తదితరులు కీలక పాత్రలు పోషించారు. రాస్‌ డఫర్‌ రూపొందించారు. తాజాగా ఈ సిరీస్‌ ట్రైలర్‌ను ఇన్‌స్టా వేదికగా విడుదల చేసింది ఓటీటీ సంస్థ నెట్‌ఫ్లిక్స్‌. ‘‘మనం వెక్నాను కనిపెట్టి ఇక శాశ్వతంగా ముగింపు పలుకుదాం’, ‘నువ్వు దీని ముగింపును రాయలేవు’’ లాంటి సంభాషణలతో సాగుతున్న ఈ ట్రైలర్‌ ప్రేక్షకులను ఆకట్టుకుంటోంది. 1980లో హాకిన్స్‌ అనే ఊరిలో మనుషులపై ప్రయోగాలు జరుగుతుంటాయి. ఈ ప్రభావం హాకిన్స్‌లోని ప్రజలపై ఎలా పడుతుంది? వాళ్లు ఏం చేశారు? అన్నదే ఈ సిరీస్‌ కథ. నవంబరులో విడుదల కానుంది.