అచ్చియ్యమ్మ విచ్చేసిందహో!

కథానాయకుడు రామ్‌చరణ్‌.. దర్శకుడు బుచ్చిబాబు సాన కలయికలో రూపొందుతున్న పాన్‌ ఇండియా చిత్రం ‘పెద్ది’. మైత్రీ మూవీ మేకర్స్, సుకుమార్‌ రైటింగ్స్‌ సమర్పణలో వెంకట సతీశ్‌ కిలారు నిర్మిస్తున్నారు. జాన్వీ కపూర్‌ కథానాయిక. ఆమె ఇందులో అచ్చియ్యమ్మ అనే పాత్రలో కనువిందు చేయనుందని తెలియజేస్తూ చిత్ర బృందం రెండు కొత్త లుక్స్‌ను విడుదల చేసింది. దీంట్లో తనది దేనికీ భయపడని ఫైర్‌బ్రాండ్‌ లాంటి అమ్మాయి తరహా పాత్రగా ఉంటుందని చిత్ర వర్గాలు తెలిపాయి. క్రీడా నేపథ్య అంశాలతో ముడిపడి ఉన్న ఈ రూరల్‌ యాక్షన్‌ ఎంటర్‌టైనర్‌లో రామ్‌చరణ్‌ ఓ ఆటకూలీగా కనిపించనున్నట్లు తెలిసింది. ప్రస్తుతం చిత్రీకరణ దశలో ఉన్న ఈ సినిమా వచ్చే ఏడాది మార్చి 27న థియేటర్లలోకి రానుంది. ఈ చిత్రానికి సంగీతం: ఏఆర్‌ రెహమాన్, ఛాయాగ్రహణం: ఆర్‌.రత్నవేలు.